പുതിയ കാർ വാങ്ങാൻ, കാർ ലോൺ ആണോ പേഴ്സണൽ ലോൺ ആണോ ലാഭകരം?

കാർ നിർമ്മാതാക്കൾ സാധാരണയായി ഡിസംബർ മാസത്തിൽ ആകർഷകമായ ഡീലുകൾ വാഗ്ദാനം ചെയ്യാറുണ്ട്. കൂടാതെ, ബാങ്ക് വായ്പകളുടെയും പലിശനിരക്ക് കുറഞ്ഞു. ആകർഷകമായ കിഴിവുകൾ നൽകി വർഷാവസാന സ്റ്റോക്കുകൾ വിറ്റഴിക്കാനുള്ള തിരക്കിലാണ് ഡീലർമാർ. അതിനാൽ, കുടുംബത്തിനായി ഒരു പുതിയ കാർ വാങ്ങാൻ ഇതിലും മികച്ച സമയമില്ല.

കാർ ലോൺ

കാർ വാങ്ങാൻ മുഴുവൻ തുകയും കൈയിൽ വേണമെന്നില്ല, നിരവധി വായ്പകളും ലഭ്യമാണ്. സാധാരണഗതിയിൽ, കാർ വായ്പകൾ മൂന്ന് മുതൽ അഞ്ച് വർഷം വരെ കാലാവധിയിലാണ് ലഭിക്കുക. എന്നാൽ ചില ബാങ്കുകൾ ഏഴ് വർഷം വരെ കാലാവധിയും വായ്പ വാഗ്ദാനം ചെയ്യുന്നുണ്ട്. കൂടുതൽ കാലാവധിയുള്ള വായ്പയുടെ പ്രതിമാസ തവണ വളരെ കുറവായിരിക്കും. എന്നാൽ പലിശ കൂടുതൽ നൽകേണ്ടി വരുമെന്ന് മാത്രം.

വായ്പാ തുക

ചില സ്വകാര്യമേഖല ബാങ്കുകൾ കാറിന്റെ മുഴുവൻ എക്സ്ഷോറൂം വിലയ്ക്കും വായ്പ നൽകും, മറ്റുള്ളവ 80 ശതമാനം വരെ വായ്പ വാഗ്ദാനം ചെയ്യുന്നു. ഒരു കാർ വാങ്ങുന്നതിനായി മാത്രമേ കാർ ലോൺ എടുക്കാൻ കഴിയൂ. എന്നാൽ, ഒരു വ്യക്തിക്ക് വ്യക്തിഗത വായ്പ ഉപയോഗിച്ചും പുതിയ കാർ എളുപ്പത്തിൽ വാങ്ങാൻ കഴിയും.

പേഴ്സണൽ ലോൺ

നിങ്ങൾക്ക് വായ്പ തിരിച്ചടയ്ക്കാനായില്ലെങ്കിൽ ബാങ്കിന്റെ കുടിശ്ശിക ഈടാക്കാൻ ബാങ്കിന് കാർ പിടിച്ചെടുക്കാൻ കഴിയും. എന്നാൽ വ്യക്തിഗത വായ്പയ്ക്ക് ഒന്നും തന്നെ ഈട് വയ്ക്കേണ്ട ആവശ്യമില്ല. കൂടാതെ, വായ്പയെടുക്കുന്നയാൾ വായ്പ എടുക്കുന്നതിനുള്ള കാരണവും വ്യക്തമാക്കേണ്ടതില്ല. വിദേശ യാത്രയ്ക്കോ, വീട് പുതുക്കി പണിയുന്നതിനോ അല്ലെങ്കിൽ ഒരു കാർ വാങ്ങുന്നതിനോ ഒക്കെ നിങ്ങൾക്ക് വ്യക്തിഗത വായ്പ എടുക്കാം. എന്നാൽ വായ്പ തിരിച്ചടയ്ക്കാതിരുന്നാൽ നിങ്ങളുടെ ക്രെഡിറ്റ് സ്കോർ കുറയുകയും കർശനമായ നിയമ നടപടികൾ നേരിടേണ്ടി വരികയും ചെയ്യും.

പലിശ നിരക്ക്

ബാങ്കുകളിലും ​​ഓട്ടോ ഫിനാൻസ് കമ്പനികളിലും വാഹന വായ്പയ്ക്ക് ​​പ്രതിവർഷം 9 ശതമാനം മുതൽ 15 ശതമാനം വരെ പലിശ നൽകണം. എന്നാൽ, അതേ ബാങ്കിൽ നിന്നുള്ള വ്യക്തിഗത വായ്പയ്ക്ക് 10.35 ശതമാനം മുതൽ 21.5 ശതമാനം വരെ പലിശ നിരക്ക് ഈടാക്കാം. കൂടാതെ, ഒരു ഓട്ടോ ഫിനാൻസ് കമ്പനിയിൽ നിന്നുള്ള കാർ ലോൺ പരമാവധി അഞ്ച് വർഷത്തിനുള്ളിൽ തിരിച്ചടയ്ക്കണം.