നാഷണൽ സേവിംഗ്സ് സർട്ടിഫിക്കറ്റ്, 5 വർഷത്തെ ബാങ്ക് എഫ്ഡി: മികച്ച നിക്ഷേപ ഓപ്ഷൻ ഏത്?

നാഷണൽ സേവിംഗ്സ് സർ‌ട്ടിഫിക്കറ്റ് (എൻ‌എസ്‌സി), 5 വർഷത്തെ ഫിക്‌സഡ് ഡെപ്പോസിറ്റ് (എഫ്ഡി) എന്നിവ ഒരു ഹ്രസ്വകാല നിക്ഷേപം എന്നതിൽ ഉപരി നികുതി ലാഭിക്കാൻ ആഗ്രഹിക്കുന്നവർക്കും റിസ്കെടുക്കാൻ ആഗ്രഹിക്കാത്തവർക്കും പറ്റിയ നിക്ഷേപങ്ങളാണ്. എൻ‌എസ്‌സി സർക്കാർ അംഗീകൃത സേവിംഗ്സ് സ്കീം ആണ്. എന്നാൽ സ്ഥിര നിക്ഷേപം സ്വകാര്യ, പൊതുമേഖലാ ബാങ്കുകൾ, പോസ്റ്റോഫീസ്, മറ്റ് ബാങ്കിംഗ് ഇതര ധനകാര്യ സ്ഥാപനങ്ങൾ എന്നിവയെല്ലാം വാഗ്ദാനം ചെയ്യുന്നുണ്ട്.

നികുതി ഇളവ്

ആദായനികുതി നിയമത്തിലെ സെക്ഷൻ 80 സി പ്രകാരം പരമാവധി 1.5 ലക്ഷം രൂപ കിഴിവുകൾ ക്ലെയിം ചെയ്യാൻ നിക്ഷേപകരെ ഈ രണ്ട് നിക്ഷേപ പദ്ധതികളും അനുവദിക്കുന്നുണ്ട്. എൻ‌എസ്‌സിയും 5 വർഷത്തെ എഫ്‌ഡികളും 80 സി സംവിധാനത്തിന് കീഴിൽ നികുതി ആനുകൂല്യങ്ങൾ വാഗ്ദാനം ചെയ്യുന്നുണ്ടെങ്കിലും, നികുതി വീക്ഷണകോണിൽ എൻ‌എസ്‌സിയാണ് ഏറ്റവും മികച്ച ഓപ്ഷൻ. കാരണം എൻ‌എസ്‌സി നൽകുന്ന പലിശ വീണ്ടും നിക്ഷേപിക്കുന്നതിനാൽ ആദ്യ 4 വർഷത്തേക്ക് അടച്ച ഈ പലിശ 80 സി പ്രകാരം നികുതി ആനുകൂല്യത്തിന് അർഹമാണ്.അതേ സമയം 5 വർഷത്തെ എഫ്ഡിയിൽ നിന്ന് നേടുന്ന പലിശയ്ക്ക് നിക്ഷേപകന് നികുതി നൽകണം.

പലിശനിരക്ക്

നിലവിൽ 5 വർഷത്തെ ബാങ്ക് എഫ്ഡികളുമായി താരതമ്യപ്പെടുത്തുമ്പോൾ എൻ‌എസ്‌സിയുടെ പലിശ നിരക്ക് പ്രതിവർഷം 6.8 ശതമാനമാണ്, അതിൽ വിവിധ ബാങ്കുകളെ അടിസ്ഥാനമാക്കി പലിശ നിരക്ക് 4.5 ശതമാനത്തിൽ നിന്ന് 7 ശതമാനമായി വ്യത്യാസപ്പെടാം. തികച്ചും സുരക്ഷിതമായ പൊതുമേഖലാ ബാങ്കുകൾ 5.2-5.4 ശതമാനം പരിധിയിലാണ് പലിശനിരക്ക് വാഗ്ദാനം ചെയ്യുന്നത്. നിലവിലെ പകർച്ചവ്യാധി കണക്കിലെടുത്ത് സമീപഭാവിയിൽ എഫ്ഡി നിരക്കുകൾ ഉയർന്നേക്കില്ലെന്ന് ഓറോവെൽത്തിന്റെ സഹസ്ഥാപകൻ വിജയ് കുപ്പ അഭിപ്രായപ്പെട്ടു.

സുരക്ഷ

എൻ‌എസ്‌സി സർക്കാർ പിന്തുണയുള്ളതായതു കൊണ്ട് തന്നെ ബാങ്കുകളുമായി താരതമ്യപ്പെടുത്തുമ്പോൾ ഇത് അധിക സുരക്ഷ ഉറപ്പു നൽകുന്നു.

പിൻവലിക്കൽ

എൻ‌എസ്‌സിയിൽ, 5 അല്ലെങ്കിൽ 10 വർഷം കാലാവധി പൂർത്തിയാകുന്നതിന് മുമ്പ് നേരത്തെയുള്ള പിൻവലിക്കൽ ലഭ്യമല്ല. ഉടമയുടെ മരണം, കോടതി ഉത്തരവിട്ട പിൻ‌വലിക്കൽ എന്നിവ മാത്രമേ എൻ‌എസ്‌സിയിൽ നിന്ന് നേരത്തെ പണം പിൻവലിക്കാൻ അനുവദിക്കുകയുള്ളൂ. മറുവശത്ത്, സ്ഥിര നിക്ഷേപം നേരത്തേ പിൻവലിക്കുന്നത് മിക്കവാറും എല്ലാ ബാങ്കുകളും അനുവദിക്കും. എന്നാൽ ഇതിന് ചെറിയ ഒരു ഫീസ് ഈടാക്കും.