ഇന്ത്യയിലെ പേയ്മെന്റ് ബാങ്കുകൾ ഏതൊക്കെ? ഏറ്റവും മികച്ചതേത്?

ദൈനംദിന ജീവിതത്തിൽ പേയ്മെന്റ്സ് ബാങ്കുകളുടെ സേവനം ഉപയോ​ഗിക്കാത്തവ‍ർ ഇന്ന് വളരെ കുറവാണ്. ഇന്ത്യയിലെ മികച്ച അഞ്ച് പേയ്മെന്റ് ബാങ്കുകൾ ഏതൊക്കെയാണെന്ന് അറിയാമോ?

എന്താണ് പേയ്മെന്റ് ബാങ്ക്?

കൂടുതല്‍ ജനങ്ങളിലേക്ക് ബാങ്കിങ് സേവനം എത്തിക്കുക എന്ന ലക്ഷ്യവുമായാണ് രാജ്യത്ത് പേയ്മെന്റ് ബാങ്കുകൾക്ക് അനുമതി നൽകിയത്. പേയ്മെന്റ് ബാങ്കുകളും മറ്റ് ബാങ്കുകളും തമ്മിൽ വ്യത്യാസങ്ങൾ ഉണ്ട്. മറ്റ് ബാങ്കുകളെ പോലെ ക്രെഡിറ്റ് കാർഡുകൾ പേയ്മെന്റ് ബാങ്ക് നൽകില്ല. എന്നാൽ എടിഎം കാർഡ്, ഡെബിറ്റ് കാർഡ്, ഓൺലൈൻ ബാങ്കിങ് സേവനങ്ങൾ, മൊബൈൽ ബാങ്കിംഗ് സേവനങ്ങൾ എന്നിവ വാഗ്ദാനം ചെയ്യുന്നു. സേവിം​ഗ്സ് അക്കൗണ്ടുകളും ഉപഭോക്താക്കൾക്ക് ആരംഭിക്കാവുന്നതാണ്.

എയ‍ർടെൽ പേയ്മെന്റ് ബാങ്ക്

രാജ്യത്തെ ആദ്യ പേയ്‌മെന്റ് ബാങ്കാണ് എയ‍ർടെൽ പേയ്മെന്റ് ബാങ്ക്. സേവിംഗ് ബാങ്ക് അക്കൗണ്ടുകള്‍ക്ക് 7.25 ശതമാനം പലിശ വാഗ്ദാനം ചെയ്തുകൊണ്ടാണ് രാജസ്ഥാനില്‍ ആദ്യ ബാങ്ക് ആരംഭിച്ചത്. ഇപ്പോൾ 5.5 ശതമാനമാണ് പലിശ.

ഇന്ത്യാ പോസ്റ്റ് പേയ്മെന്റ്സ് ബാങ്ക്

കേന്ദ്ര തപാല്‍ വകുപ്പിന്റെ സംരംഭമാണ് ഇന്ത്യാ പോസ്റ്റ് പേയ്മെന്റ്സ് ബാങ്ക്. ഇന്ത്യയിലെ ഏറ്റവും വലിയ രണ്ടാമത്തെ പേയ്മെന്റ് ബാങ്കായി മാറാനുള്ള ശ്രമത്തിലാണ് ഇന്ത്യാ പോസ്റ്റ് പേയ്മെന്റ്സ് ബാങ്ക്. നിക്ഷേപം സ്വീകരിക്കല്‍, പണം ഒരിടത്തുനിന്ന് മറ്റൊരിടത്തേക്ക് അയയ്ക്കല്‍, ഇന്റര്‍നെറ്റ് ബാങ്കിങ് തുടങ്ങിയ സേവനങ്ങള്‍ ഈ പേയ്‌മെന്റ്‌സ് ബാങ്കിലൂടെ നടത്താന്‍ കഴിയും. മ്യൂച്ച്വല്‍ ഫണ്ടുകള്‍, ഇന്‍ഷുറന്‍സ്, പെന്‍ഷന്‍ എന്നീ സേവനങ്ങളും നടത്താം.

പേടിഎം പേയ്മെന്റ് ബാങ്ക്

നാല് ശതമാനം പലിശ നിരക്കുമായാണ് പേടിഎമ്മിന്‍റെ പേയ്മെന്‍റ് ബാങ്ക് പ്രവ‍ർത്തനമാരംഭിച്ചത്. പേടിഎമ്മിന്‍റെ ഉടമസ്ഥനായ വിജയ് ശേഖർ ശർമയുടെ പേരിലാണ് ലൈസൻസ് ലഭിച്ചിട്ടുള്ളത്. എയർടെല്ലിനും ഇന്ത്യാ പോസ്റ്റിനും ശേഷം രാജ്യത്ത് പ്രവർത്തനമാരംഭിക്കുന്ന മൂന്നാമത്തെ പേയ്മെന്‍റ് ബാങ്കാണ് പേടിഎമ്മിന്‍റേത്.

ഫിനോ പേയ്മെന്റ് ബാങ്ക്

ഇന്ത്യയിലെ നാലാമത്തെ പേയ്മെന്റ് ബാങ്കാണ് ഫിനോ പേയ്മെന്റ് ബാങ്ക്. സേവിംഗ്സ് അക്കൗണ്ടിൽ നിന്ന് പണം നൽകുന്നത് കൂടാതെ, കസ്റ്റമർമാർക്ക് കറന്റ് അക്കൗണ്ടും ചെറിയ ക്രെഡിറ്റും ഫിനോ വാ​ഗ്ദാനം ചെയ്യുന്നുണ്ട്. നാല് ശതമാനമാണ് പലിശ.

ജിയോ പേയ്മെന്റ് ബാങ്ക്

രാജ്യത്തെ ഏറ്റവും വലിയ പൊതുമേഖല ബാങ്കായ എസ്​ബിഐയുമായി ചേർന്ന്​ റിലയൻസ്​ ജിയോ പേയ്​മെന്റ് ബാങ്കിന്​ തുടക്കം കുറിക്കുന്നുവെന്നാണ് അടുത്തിടെ പുറത്തു വന്ന വാ‍‍ർത്തകൾ. പേയ്മെന്റ് ബാങ്ക് ആരംഭിക്കുന്നതിന് റിസർവ്​ ബാങ്കിന്റെ അനുമതി ലഭിച്ചു കഴിഞ്ഞു. പേയ്​മെന്റ്​ ബാങ്കിൽ 70 ശതമാനം ഒാഹരികൾ റിലയൻസിനും 30 ശതമാനം എസ്​ബിഐക്കും ആയിരിക്കും.

malayalam.goodreturns.in