ഇനി ജിമെയിലിലൂടെയും പണം അയയ്ക്കാം; ട്രയൽ റൺ ഇന്ത്യയിൽ തുടങ്ങി, അറിയേണ്ട കാര്യങ്ങൾ

ട്രയൽ റൺ തുടങ്ങി

ജിമെയിൽ വഴി പണമിടപാട് നടത്തുന്നതിനുള്ള ട്രയൽ റൺ ഇന്ത്യയിൽ ആരംഭിച്ചു കഴിഞ്ഞു. പണം അയയ്ക്കാനും സ്വീകരിക്കാനും ചില ഇന്ത്യൻ ഉപഭോക്താക്കളെ ​ഗൂ​ഗിൾ പ്രവർത്തനക്ഷമമാക്കി കഴിഞ്ഞുവെന്നാണ് റിപ്പോർട്ട്. മറ്റ് ചില രാജ്യങ്ങളിൽ നേരത്തേ തന്നെ ഇതിനായുള്ള നടപടികൾ ആരംഭിച്ചിരുന്നു.

​ഗൂ​ഗിൾ പേയുമായി ചേ‍ർന്ന്

ജിമെയിലും ഗൂ​ഗിൾ പേയുമായി ചേ‍ർന്നാണ് പുതിയ സേവനത്തിന് തുടക്കം കുറിക്കുന്നത്. രണ്ട് പ്ലാറ്റ്ഫോമുകളുടെയും ആഴത്തിലുള്ള ഏകീകരണത്തിലൂടെയാണ് സാങ്കേതിക ഭീമനായ ​ഗൂ​ഗിൾ പദ്ധതി നടപ്പിലാക്കുന്നതെന്നാണ് റിപ്പോർട്ടുകൾ.

പണം അയയ്ക്കുന്നത് എങ്ങനെ?

• നിങ്ങളുടെ ജിമെയിൽ അക്കൗണ്ട് തുറക്കുക

• compose mail ഓപ്ഷനിൽ ക്ലിക്ക് ചെയ്യുക

• തുറന്നു വരുന്ന ടൂൾ ബാറിലെ ഡോളർ ചിഹ്നത്തിൽ ക്ലിക്ക് ചെയ്യുക

• തുടർന്ന് ​ഗൂ​ഗിൾ പേ ഡയലോ​ഗ് ബോക്സ് തുറന്നു വരും

• ഇതുവഴി പണമിടപാട് നടത്താം
  

എന്താണ് ​​ഗൂ​ഗിൾ പേ?

ഫോണുകൾ, വാച്ചുകൾ, ഡെസ്ക്ക്ടോപ്പുകൾ എന്നിവയ്ക്കായി ​ഗൂ​ഗിൾ വികസിപ്പിച്ച ഡിജിറ്റൽ വാലറ്റ് അഥവാ ഓൺലൈൻ പേയ്മെന്റ് സംവിധാനമാണ് ഗൂഗിൾ പേ. നിങ്ങളുടെ ഡെബിറ്റ് അല്ലെങ്കിൽ ക്രെഡിറ്റ് കാർഡ് വിശദാംശങ്ങൾ ​ഗൂ​ഗിൾ പേയുമായി ബന്ധിപ്പിച്ചിട്ടുണ്ടെങ്കിൽ പണമിടപാടുകൾ വളരെ വേ​ഗത്തിൽ നടത്താനാകും. നിങ്ങളുടെ ബാങ്ക് അക്കൗണ്ട് അല്ലെങ്കിൽ ഫോൺ നമ്പർ പോലുള്ള സ്വകാര്യ വിവരങ്ങൾ പങ്കിടാതെ തന്നെ മറ്റൊരാൾക്ക് പണം ഉടനടി അയയ്ക്കാൻ ഇതുവഴി സാധിക്കും.