പ്രധാൻ മന്ത്രി ആവാസ് യോജന: അപേക്ഷ നൽകുന്നവർക്ക് സന്തോഷ വാർത്ത, കാലതാമസം വന്നാൽ പിടിവീഴും

പ്രധാനമന്ത്രി ആവാസ് യോജനയ്ക്ക് കീഴിൽ നിങ്ങൾ ഭവനവായ്പ പലിശ സബ്സിഡിക്ക് അപേക്ഷിച്ചിട്ടുണ്ടോ? എങ്കിൽ ഇനി മുതൽ തത്സമയം നിങ്ങളുടെ അപേക്ഷയുടെ നില പരിശോധിക്കാൻ കഴിയും. കൃത്യമായ പ്രക്രിയയിലൂടെയാണോ അപേക്ഷ നടപടികൾ കടന്നു പോകുന്നതെന്നും എവിടെയാണ് കാലതാമസം നേരിടുന്നതെന്നും ഏത് ഏജൻസിയാണ് കാലതാമസത്തിന് ഉത്തരവാദിയെന്നും കണ്ടെത്താൻ ഈ ട്രാക്കിം​ഗ് സംവിധാനത്തിലൂടെ കണ്ടെത്താം.

സെപ്റ്റംബർ മുതൽ

സെപ്റ്റംബർ അവസാനത്തോടെ ട്രാക്കിംഗ് സംവിധാനം ഏർപ്പെടുത്തണമെന്ന് പ്രധാനമന്ത്രി നരേന്ദ്ര മോദി ഭവന, ധനമന്ത്രാലയങ്ങൾക്ക് നിർദേശം നൽകി. പലിശ സബ്‌സിഡിയ്ക്കുള്ള അപേക്ഷ സമർപ്പിച്ചാലും പല ബാങ്കുകളും മാസങ്ങളോളം അപേക്ഷകരോട് പ്രതികരിക്കാറില്ല. ഭവന മന്ത്രാലയത്തിന് പോലും പല അപേക്ഷകളുടെയും അപ്‌ഡേറ്റുകൾ ലഭിച്ചിട്ടില്ല. ഇക്കാരണങ്ങളാൽ അപേക്ഷകരിൽ നിന്ന് നിരവധി പരാതികൾ ലഭിക്കുകയും ചെയ്തിട്ടുണ്ട്.

യുണീക്ക് ഐഡന്റിഫിക്കേഷൻ നമ്പർ

നിർദ്ദിഷ്ട സംവിധാനത്തിന് കീഴിൽ, ഓരോ അപേക്ഷകനും ബാങ്ക് ഭവന വായ്പ അപേക്ഷ അംഗീകരിച്ചതിനുശേഷം ഒരു യുണീക്ക് ഐഡന്റിഫിക്കേഷൻ നമ്പർ നൽകും. ഈ നമ്പർ ഉപയോ​ഗിച്ചാണ് അപേക്ഷയുടെ നില ട്രാക്ക് ചെയ്യേണ്ടത്. അപേക്ഷ എവിടെയാണ് തീർപ്പുകൽപ്പിക്കാതെ കെട്ടിക്കിടക്കുന്നതെന്നും ഇതുവഴി അറിയാനാകും. നടപടി ക്രമങ്ങൾ കൂടുതൽ സുതാര്യക്കുന്ന പദ്ധതിയാണിത്.

സബ്സിഡി

18 ലക്ഷം രൂപ വരെ വാർഷിക വരുമാനമുള്ള ഭവനവായ്പ അപേക്ഷകർക്ക് ക്രെഡിറ്റ് ലിങ്ക്ഡ് സബ്സിഡി സ്കീമിന് കീഴിൽ കേന്ദ്ര സർക്കാരിൽ നിന്ന് 2.5 ലക്ഷം രൂപ വരെ സബ്സിഡി ലഭിക്കാൻ അർഹതയുണ്ട്. ഭവന വായ്പ എല്ലാവർക്കും താങ്ങാനാകുന്നതാക്കുക എന്നതാണ് പിഎംഎവൈ പദ്ധതിയുടെ ലക്ഷ്യം.

നിബന്ധനകൾ

ഈ സ്കീമിന് കീഴിൽ സബ്സിഡി ലഭിക്കുന്നതിന്, അപേക്ഷന്റെ പേരിലോ കുടുംബാംഗങ്ങളുടെ പേരിലോ മറ്റ് വീടുകൾ ഉണ്ടായിരിക്കരുത്. കൂടാതെ ഗുണഭോക്തൃ കുടുംബത്തിന് മറ്റേതെങ്കിലും ഭവന പദ്ധതി പ്രകാരം സർക്കാരിൽ നിന്ന് ഒരു തരത്തിലുള്ള ആനുകൂല്യവും മുമ്പ് ലഭിച്ചിട്ടുമുണ്ടാകരുത്. സി‌എൽ‌എസ്‌എസ് പദ്ധതി പ്രകാരം ഇതുവരെ 6.55 ലക്ഷം ഗുണഭോക്താക്കൾക്ക് 14,737 കോടി രൂപയാണ് പലിശ സബ്‌സിഡി ലഭിച്ചിട്ടുള്ളത്.

malayalam.goodreturns.in