ദില്ലി: സ്ഥിര നിക്ഷേപത്തിന് മേലുള്ള പലിശക്ക് വളരെ ഉയര്ന്ന നികുതിയാണ് ഇടാക്കാറുള്ളത്. സ്ഥിര നിക്ഷേപങ്ങളിൽ നിന്ന് നേടിയ പലിശ മൊത്തം വരുമാനത്തിലേക്ക് ചേർത്താണ് നികുതി നിരക്ക് കണക്കാക്കാറുള്ളത്. നിങ്ങൾ ഏറ്റവും ഉയർന്ന നികുതി പരിധിയിലാണെങ്കിൽ, നിങ്ങളുടെ പോസ്റ്റ് ടാക്സ് റിട്ടേണുകൾ ഗണ്യമായി കുറയുന്ന സ്ഥിതിയുണ്ടാകും. ഒരു ബാങ്ക് 6 ശതമാനം പലിശനിരക്ക് നൽകുന്നുവെന്ന് കരുതുക. നിങ്ങൾ 30 ശതമാനം നികുതി പരിധിയിലാണെങ്കിൽ, നിങ്ങളുടെ വരുമാനം വെറും 4 ശതമാനമായി കുറയും. അതുപോലെ, നിങ്ങൾ മറ്റ് നികുതി പരിതകളിലാണെങ്കില് പോലും നിങ്ങളുടെ വരുമാനം കുറയും. ഈ സാഹചര്യത്തില് നിങ്ങള്ക്കായി പലിശ വരുമാനം നികുതി രഹിതമായ കുറച്ച് നിക്ഷേപങ്ങൾ പരിചയപ്പെടുത്തുകയാണ് ഇവിടെ.
പബ്ലിക് പ്രൊവിഡന്റ് ഫണ്ട്
പബ്ലിക് പ്രൊവിഡന്റ് ഫണ്ടിൽ നിന്ന് ലഭിക്കുന്ന പലിശയെ നികുതിയിൽ നിന്ന് ഒഴിവാക്കിയിട്ടുണ്ട്. പിപിഎഫ് നിങ്ങൾക്ക് 7.1 ശതമാനം പലിശനിരക്കാണ് നല്കുന്നത്, ഇത് ബാങ്കുകൾ ഇപ്പോൾ നൽകുന്നതിനേക്കാൾ 2 ശതമാനം കൂടുതലാണ്. ഇതിനുപുറമെ, ആദായനികുതി നിയമത്തിലെ Sec80c പ്രകാരം നികുതി ആനുകൂല്യവും നിക്ഷേപം വാഗ്ദാനം ചെയ്യുന്നു. പിപിഎഫ് ഒരു ദീർഘകാല നിക്ഷേപമാണ് എന്നതാണ് പ്രധാനപ്പെട്ട ഒരു പോരായ്മ. 15 വർഷത്തേക്കാണ് ഇതിലെ നിക്ഷേപം. ഭാഗിക പിൻവലിക്കൽ 7 വർഷത്തെ കാലയളവിനുശേഷം മാത്രമേ ലഭ്യമാകൂ. ചുരുക്കത്തിൽ, നിങ്ങൾ ഒരു ദീർഘകാല നിക്ഷേപകനാണെങ്കിൽ മാത്രം പിപിഎഫ് തിരഞ്ഞെടുക്കുന്നതായിരിക്കും ഉചിതമാവുക. ഒരാൾക്ക് പിപിഎഫിൽ നിക്ഷേപിക്കാൻ കഴിയുന്ന പരമാവധി തുക 1,50,000 രൂപയാണ്.
നികുതി രഹിത ബോണ്ടുകൾ
സർക്കാർ ഉടമസ്ഥതയിലുള്ള കമ്പനികളായ ഹഡ്കോ, റൂറൽ ഇലക്ട്രിഫിക്കേഷൻ കോർപ്പറേഷൻ, പവർ ഫിനാൻസ് കോർപ്പറേഷൻ, ഇന്ത്യൻ റെയിൽവേ ഫിനാൻസ് കോർപ്പറേഷൻ തുടങ്ങിയ നിരവധി നികുതി രഹിത ബോണ്ടുകൾ ഇഷ്യു ചെയ്തിട്ടുണ്ട്. ഈ നികുതി രഹിത ബോണ്ടുകൾ സ്റ്റോക്ക് എക്സ്ചേഞ്ചുകളിൽ ട്രേഡ് ചെയ്യപ്പെടുന്നു, അതുപോലെ തന്നെ ഏത് വ്യക്തിക്കും ഈ ഓഹരികള് വാങ്ങാന് കഴിയും. ഈ ബോണ്ടുകളിൽ നിന്ന് ലഭിക്കുന്ന പലിശ നികുതിരഹിതമാണ്. 7 മുതൽ 8 ശതമാനം വരെയാണ്. ഈ ബോണ്ടുകൾ സർക്കാർ ഉടമസ്ഥതയിലുള്ള കമ്പനികളായതിനാൽ അവ സുരക്ഷിതവുമാണ്.
വൊളണ്ടറി പ്രൊവിഡന്റ് ഫണ്ട്
എംപ്ലോയീസ് പ്രൊവിഡന്റ് ഫണ്ടിന്റെ (ഇപിഎഫ്) വിപുലീകരണമാണ് വൊളണ്ടറി പ്രൊവിഡന്റ് ഫണ്ട്. വിശദീകരിക്കാം. നിങ്ങളുടെ ശമ്പളത്തില് പരമാവധി 12 ശതമാനം അടിസ്ഥാന, ഡിഎ സംഭാവന നിങ്ങളുടെ ഇപിഎഫിന് നൽകാം. എന്നിരുന്നാലും, നിങ്ങൾക്ക് കൂടുതൽ സംഭാവന നൽകണമെങ്കിൽ, നിങ്ങൾ അത് വിപിഎഫ് വഴി വേണം ചെയ്യാന്. 5 വർഷമായി പണം അടയ്ക്കുന്നുണ്ടെങ്കില് വൊളണ്ടറി പ്രൊവിഡന്റ് ഫണ്ടിൽ നിന്നുള്ള പലിശയും നികുതി രഹിതമാണ്.