എന്താണ് എസ്‌ബി‌ഐ സ്വർണ്ണ നിക്ഷേപ പദ്ധതി? പലിശ നിരക്കുകൾ, കാലാവധി, മറ്റ് വിശദാംശങ്ങൾ

സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) സ്വർണ്ണത്തിൽ ഒരു സ്ഥിര നിക്ഷേപ പദ്ധതി വാഗ്ദാനം ചെയ്യുന്നുണ്ട്. ആർ-ജിഡിഎസ് എന്നാണ് ഈ സ്വർണ നിക്ഷേപ പദ്ധതി അറിയപ്പെടുന്നത്. എസ്‌ബി‌ഐയുടെ നിർദ്ദേശമനുസരിച്ച് ഉപഭോക്താക്കൾ‌ക്ക് അവരുടെ നിഷ്‌ക്രിയ സ്വർണം ആർ‌-ജി‌ഡി‌എസിന് കീഴിൽ നിക്ഷേപിക്കാൻ‌ കഴിയും. ഇതുവഴി സ്വർണം സുരക്ഷിതമാക്കാനും പലിശ വരുമാനം നേടാനും സാധിക്കും.

നിക്ഷേപം നടത്തുന്നത് എങ്ങനെ?

ഉപഭോക്താക്കൾക്ക് സ്വർണ്ണ ബാറുകൾ, നാണയങ്ങൾ, കല്ലുകൾ ഒഴികെയുള്ള ആഭരണങ്ങൾ, മറ്റ് ലോഹങ്ങൾ അടങ്ങിയിട്ടില്ലാത്ത ആഭരണങ്ങൾ ഇവയൊക്കെ ആർ-ജിഡിഎസ് പദ്ധതിയ്ക്ക് കീഴിൽ നിക്ഷേപിക്കാം. കൂടാതെ ആർ-ജിഡിഎസിൽ നിക്ഷേപിക്കുന്നതിന്, ഉപഭോക്താക്കൾ അപേക്ഷാ ഫോം, തിരിച്ചറിയൽ രേഖ, വിലാസ തെളിവ്, ഇൻവെന്ററി ഫോം എന്നിവ സമർപ്പിക്കേണ്ടതുണ്ട്.

വിവിധ തരം നിക്ഷേപം

മൂന്ന് തരം നിക്ഷേപങ്ങളാണ് ആർ-ജിഡിഎസിന് കീഴിലുള്ളത്.

• ഹ്രസ്വകാല ബാങ്ക് നിക്ഷേപം (എസ്ടിബിഡി) - 1 മുതൽ 3 വർഷം വരെ കാലാവധി
• മീഡിയം ടേം ഗവൺമെന്റ് ഡെപ്പോസിറ്റ് (എംടിജിഡി) - 5 മുതൽ 7 വർഷം വരെ കാലാവധി
• ദീർഘകാല ഗവൺമെന്റ് നിക്ഷേപം (LTGD): 12 മുതൽ 15 വർഷം വരെ കാലാവധി

ആർക്കൊക്കെ നിക്ഷേപിക്കാം?

ആർ-ജിഡിഎസ് നിക്ഷേപത്തിന് യോഗ്യരായവർ താഴെ പറയുന്നവരാണ്

• വ്യക്തികൾക്ക് ഒറ്റയ്ക്കോ സംയുക്തമായോ
• പ്രൊപ്രൈറ്റർഷിപ്പ്, പങ്കാളിത്ത സ്ഥാപനങ്ങൾ.
• ഹിന്ദു അവിഭക്ത കുടുംബം
• സെബി (മ്യൂച്വൽ ഫണ്ട്) റെഗുലേഷനു കീഴിൽ രജിസ്റ്റർ ചെയ്തിട്ടുള്ള മ്യൂച്വൽ ഫണ്ടുകൾ / എക്സ്ചേഞ്ച് ട്രേഡഡ് ഫണ്ടുകൾ ഉൾപ്പെടെയുള്ള ട്രസ്റ്റുകൾ
• കമ്പനികൾ

നിക്ഷേപ പരിധി

ആർ-ജിഡിഎസിന് കീഴിൽ ഒരാൾക്ക് കുറഞ്ഞത് 30 ഗ്രാം സ്വർണം വരെ നിക്ഷേപിക്കാം. നിക്ഷേപത്തിന് പരമാവധി പരിധി നിശ്ചയിച്ചിട്ടില്ല.