മുംബൈ: ടെലികോം കമ്പനികള്‍ക്ക് ഇനി സ്പീഡില്‍ തര്‍ക്കിക്കാനാവില്ല.ഇന്റര്‍നെറ്റ് ഡേറ്റാ സ്പീഡ് ഉപയോക്താക്കള്‍ക്കു പരിശോധിക്കുന്നതിനായി ടെലികോം റെഗുലേറ്റര്‍ ട്രായി പുതിയ മൊബൈല്‍ ആപ്ലിക്കേഷന്‍ പുറത്തിറക്കി. ആന്‍ഡ്രോയിഡ് സ്മാര്‍ട്ട്‌ഫോണില്‍ പ്രവര്‍ത്തിക്കുന്ന മൈ സ്പീഡ് എന്ന ആപ്ലിക്കേഷനാണ് ട്രായ് അവതരിപ്പിച്ചത്.

രാജ്യത്തെ ഉപയോക്താക്കള്‍ക്ക് സിഗ്നല്‍ ക്വാളിറ്റി, നെറ്റ്‌വര്‍ക്ക് സ്പീഡ് എന്നിവ ആപ് ഉപയോഗിച്ച് പരിശോധിക്കാം. ലളിതമായ രീതിയിലാണ് ആപ്ലിക്കേഷന്‍ വികസിപ്പിച്ചിട്ടുള്ളത്.പ്ലേസ്റ്റോറില്‍നിന്നും ആപ് ഡൗണ്‍ലോഡ് ചെയ്യാം.

ആപ്ലിക്കേഷന്‍ ഉപയോഗിക്കുന്നവരുടെ സ്വകാര്യവിവരങ്ങള്‍ ട്രായി ശേഖരിക്കില്ല. ടെലികോം കമ്പനികളുടെ പ്രവര്‍ത്തനങ്ങളെക്കുറിച്ചുള്ള പരാതികള്‍ സ്വീകരിക്കാന്‍ മാത്രമാണ് ഈ ആപ്ലിക്കേഷന്‍ എന്നാണ് ട്രായിയുടെ വിശദീകരണം. ആന്‍ഡ്രോയിഡ് 4.3 ജെല്ലി ബീന്‍ പ്ലാറ്റ്‌ഫോമിനു മുകളിലുള്ള വേര്‍ഷനുകളിലേക്കുള്ള രീതിയിലാണ് ആപ്ലിക്കേഷന്‍ തയാറാക്കിയിരിക്കുന്നത്.