മുംബൈ: ഇന്ത്യയിലെ പ്രമുഖ ഇ-കൊമേഴ്്‌സ് സ്ഥാപനമായ ഫ്‌ളിപ്കാര്‍ട്ടിനു പിന്തുണയുമായി അമേരിക്കന്‍ മള്‍ട്ടി നാഷ്ണല്‍ റീട്ടെയില്‍ കമ്പനിയായ വാള്‍മാര്‍ട്ട്. ഫ്‌ളിപ്കാര്‍ട്ട് ഇന്ത്യയില്‍ 100 കോടി ഡോളര്‍ നിക്ഷേപം നടത്തുന്നത് സംബന്ധിച്ച അവസാനവട്ട ചര്‍ച്ചകളിലാണ് ഇരു കമ്പനികളും.

ലോകത്തിലെ തന്നെ ഏറ്റവും വലിയ റീട്ടെയില്‍ വ്യാപാര ശൃംഖലയായ വാള്‍ മാര്‍ട്ട് ഫ്‌ളിപ്കാര്‍ട്ട് ഇന്ത്യയില്‍ ന്യൂനപക്ഷ ഓഹരി സ്വന്തമാക്കിയേക്കും. മുന്‍പ് ഭാരതി ഗ്രൂപ്പുമായി ചേര്‍ന്ന് വാള്‍ മാര്‍ട്ട് ഇന്ത്യന്‍ വിപണിയിലേക്ക് പ്രവേശിക്കാന്‍ ശ്രമിച്ചിരുന്നു എന്നാലിത് പരാജയപ്പെട്ടു.

ഇന്ത്യയിലെ ഏറ്റവും വലിയ ഓണ്‍ലൈന്‍ വ്യാപാര ശൃംഖലയായിരുന്ന ഫ്‌ളിപ്കാര്‍ട്ടിന് വലിയ വെല്ലുവിളിയാണ് ആമസോണ്‍ ഇപ്പോള്‍ ഉയര്‍ത്തിയിരിക്കുന്നത്.

വാള്‍മാര്‍ട്ടിന്റെ നിക്ഷേപത്തിലൂടെ ഇരു കമ്പനികള്‍ക്കും നേട്ടങ്ങളുണ്ടാകും. ഫ്‌ളിപ്കാര്‍ട്ടിന് കൂടുതല്‍ മൂലധനം സമാഹരിക്കുന്നതിനൊപ്പം കമ്പനിയുടെ വിപുലീകരണത്തിനും ഉപകരിക്കും. വാള്‍മാര്‍ട്ടിന് ഇന്ത്യന്‍ വിപണിയില്‍ സജീവമാകാനും ഇന്ത്യയിലും യുഎസിലും ആമസോണിനെ പ്രതിരോധിക്കാനും സാധിക്കും. അമേരിക്കയും ചൈനയും കഴിഞ്ഞാല്‍ ഇ-കൊമേഴ്‌സിന് ഏറ്റവും വലിയ വിപണിയുള്ളത് ഇന്ത്യയിലാണ്.