ലോകത്തെ ഏറ്റവും വലിയ സ്മാര്‍ട്ട് ഫോണ്‍ വിപണി ചൈനയാണ്. 2013ലാണ് അമേരിക്കയെ പിന്നിലാക്കി ചൈന ഈ നേട്ടം കൈവരിക്കുന്നത്. എന്നാൽ ഇപ്പോള്‍ ഇതാ അമേരിക്ക വീണ്ടും പിന്നിലേയ്ക്ക് തള്ളപ്പെട്ടിരിക്കുന്നു.

ഇന്ത്യയാണ് ഇപ്പോള്‍ രണ്ടാം സ്ഥാനം നേടിയിരിക്കുന്നത്. സാമ്പത്തിക വര്‍ഷത്തെ മൂന്നാംപാദത്തില്‍ 4 കോടി സ്മാര്‍ട്ട് ഫോണുകളാണ് രാജ്യത്ത് വിറ്റുപോയത്. ഇതില്‍ തന്നെ സാംസങിന്റെയും ഷവോമിയുടെയും വിഹിതം 46.5ശതമാനമാണ്.

വിലകുറഞ്ഞ സ്മാര്‍ട്ട്‌ഫോണുകള്‍ പുറത്തിറക്കിയതും വ്യാപകമായ 4ജി സേവനവുമാണ് അമേരിക്കയെ പിന്തള്ളി ഇന്ത്യ രണ്ടാമതെത്താന്‍ സഹായിച്ചതെന്ന് കാനലിസിന്റെ റിപ്പോര്‍ട്ടില്‍ പറയുന്നു.

94 ലക്ഷം സ്മാര്‍ട്ട്‌ഫോണുകള്‍ വിറ്റാണ് സാംസങ് ഒന്നാംസ്ഥാനം നിലനിര്‍ത്തിയത്. രണ്ടാംസ്ഥാനത്തുള്ള ഷവോമിയാകട്ടെ 92 ലക്ഷം ഫോണുകളും വിപണിയിലെത്തിച്ചു. വിലയുടെ കാര്യത്തില്‍ മധ്യനിരയിലുള്ള (15,000 രൂപ മുതല്‍ 20,000 രൂപവരെ) ഫോണുകള്‍ കൂടുതലായി വിറ്റഴിച്ചത് സാംസങ്, ഓപ്പോ, വിവോ തുടങ്ങിയ ബ്രാന്‍ഡുകളാണ്.

malayalam.goodreturns.in