ടാക്സി സേവന രം​ഗത്തെ പ്രമുഖരായ ഒല വിദേശത്തും സേവനമാരംഭിക്കുന്നു. നിലവിൽ വിദേശ രാജ്യങ്ങളിലുള്ള ഊബർ, ദീദി, ലിഫ്റ്റ്, ഗ്രാബ് തുടങ്ങിയവരാണ് ഒലയുടെ മുഖ്യ എതിരാളികൾ.

ഓസ്ട്രേലിയൻ നഗരങ്ങളായ സിഡ്നി, മെൽബൺ, പെർത്ത് എന്നിവിടങ്ങളിൽ ഒല ഡ്രൈവർമാർക്കായുള്ള രജിസ്ട്രേഷൻ ആരംഭിച്ചു കഴിഞ്ഞു. ഈ വർഷം ആദ്യ പകുതി തന്നെ ഒല ഓസ്ട്രേലിയയിൽ പ്രവർത്തനം ആരംഭിക്കുമെന്നാണ് വിവരം.

ഡ്രൈവർമാരിൽ നിന്ന് 7.5 ശതമാനം കമ്മീഷൻ ഈടാക്കാനാണ് കമ്പനിയുടെ തീരുമാനം. ഇത് ഊബർ, ടാക്സിഫൈ എന്നിവ ഈടാക്കുന്ന കമ്മീഷനേക്കാൾ കുറവാണ്. ഇത് മറ്റ് കമ്പനികൾക്ക് തലവേദനയാകാൻ സാധ്യതയുണ്ട്. ഊബർ 25 ശതമാനവും ടാക്സിഫൈ 15 ശതമാനവും കമ്മീഷനാണ് നിലവിൽ ഈടാക്കുന്നത്.

110 നഗരങ്ങളിൽ പ്രവർത്തിക്കുന്ന ഒലയ്ക്ക് 125 മില്യൺ ഉപഭോക്താക്കളാണ് ഇന്ത്യയിൽ ഉള്ളത്. ഊബർ ഇന്ത്യയിൽ 30 നഗരങ്ങളിൽ മാത്രമാണ് പ്രവർത്തിക്കുന്നത്. എന്നാൽ ഓസ്ട്രേലിയയിൽ ഊബറിനാണ് മേൽക്കൈയുള്ളത്.

malayalam.goodreturns.in