എയർ ഇന്ത്യ എക്സ്പ്രസിന്റെ കൊച്ചി - സിംഗപ്പൂർ സർവീസിന് ഇന്നു തുടക്കം. ആദ്യ വിമാനം ഐഎക്സ് 484 രാവിലെ 10.45ന് കൊച്ചി വിമാനത്താവളത്തിൽ നിന്ന് പുറപ്പെടും. പ്രാദേശിക സമയം വൈകിട്ട് ഏഴിനു സിംഗപ്പൂരെത്തും.
മധുര വഴിയാണ് സർവ്വീസ്. എന്നാൽ കൊച്ചി-മധുര ടിക്കറ്റില്ല. കൊച്ചിയിൽ നിന്ന് ആഴ്ച്ചയിൽ മൂന്ന് ദിവസമാണ് സർവ്വീസുള്ളത്. ചൊവ്വ, വ്യാഴം, ശനി ദിവസങ്ങളിലാണ് ഇത്.
സിംഗപ്പൂരിൽ നിന്ന് തിരിച്ചുള്ള വിമാനം ഐഎക്സ് 483 രാത്രി 8.10നു പുറപ്പെട്ട് 11.45 നു കൊച്ചിയിലെത്തും. 189 സീറ്റുളള ബോയിങ് 737 -800 വിമാനമാണ് ഉപയോഗിക്കുന്നത്.
കൊച്ചി-സിംഗപ്പൂർ റൂട്ടിൽ ആദ്യമായാണ് ഇന്ത്യൻ കമ്പനിയുടെ സർവീസ്. രാജ്യത്തെ ആദ്യ രാജ്യാന്തര ബജറ്റ് വിമാനയാത്രാ കമ്പനിയായ എയർ ഇന്ത്യ എക്സ്പ്രസ് യാത്രക്കാർക്ക് അടിസ്ഥാന ഭക്ഷണ, പാനീയങ്ങൾ സൗജന്യമായി നൽകും. ഇഷ്ടഭക്ഷണം ഓൺലൈനായി ഉറപ്പാക്കാനും സൗകര്യമുണ്ട്.
malayalam.goodreturns.in