എടിഎമ്മിൽ പോകുന്നവർ സൂക്ഷിക്കുക; പണം പിൻവലിക്കുമ്പോൾ നിങ്ങൾ ചെയ്യേണ്ടത് എന്ത്?

കൊറോണ വൈറസ് കേസുകൾ ഇന്ത്യയിൽ വർദ്ധിച്ചുകൊണ്ടിരിക്കുന്ന സാഹചര്യത്തിൽ പ്രധാനമന്ത്രി നരേന്ദ്ര മോദി രാജ്യവ്യാപകമായി 21 ദിവസത്തെ ലോക്ക് ഡൌൺ പ്രഖ്യാപിച്ചെങ്കിലും ഈ സമയത്തും ബാങ്കിംഗ് പോലുള്ള ചില അവശ്യ സേവനങ്ങൾ പൊതുജനങ്ങൾക്കായി നൽകുന്നുണ്ട്. അവയിൽ ചിലതാണ് ബാങ്കുകളും എടിഎമ്മുകളും. എന്നിരുന്നാലും കൊറോണ വൈറസ് വ്യാപന സമയമായതിനാൽ നിങ്ങളെയും കുടുംബത്തെയും അണുബാധയിൽ നിന്ന് രക്ഷിക്കാൻ ആവശ്യമായ എല്ലാ മുൻകരുതലുകളും നിങ്ങൾ സ്വീകരിക്കണം.

ജാഗ്രത വേണം

പണം പിൻവലിക്കാനായി നിങ്ങൾ ബാങ്ക് അല്ലെങ്കിൽ എടിഎമ്മിൽ പോകുന്നുണ്ടെങ്കിൽ രോഗബാധിതനായ ഒരാൾ സമീപത്തുണ്ടെന്നതു തന്നെ ജാഗ്രത പാലിക്കണം. അതായത് നിങ്ങൾക്കും രോഗം വരാം എന്ന ചിന്തയുണ്ടായിരിക്കണം. കാരണം ഒന്നിലധികം അല്ലെങ്കിൽ അജ്ഞാതരായ ആളുകൾ ബന്ധപ്പെടുന്ന ഒരു സ്ഥലമാണ് എടിഎം. അതുകൊണ്ട് തന്നെ നിങ്ങൾ ശരിയായ രീചിയിൽ ശുചിത്വം പാലിച്ചില്ലെങ്കിൽ നിങ്ങൾക്ക് രോഗം വരാനുള്ള സാധ്യതയുണ്ട്.

എസ്ബിഐയുടെ മുന്നറിയിപ്പ്

എടിഎമ്മിൽ നിന്ന് പണം പിൻവലിക്കുമ്പോൾ നിങ്ങൾ ചെയ്യേണ്ട ചില മുൻകരുതലുകൾ ഉണ്ട്. ഇന്ത്യയിലെ ഏറ്റവും വലിയ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) പണം പിൻവലിക്കുന്നതിനായി എടിഎം ഉപയോഗിക്കുന്ന എല്ലാ ബാങ്ക് ഉപഭോക്താക്കൾക്കും ചില ടിപ്പുകൾ നൽകിയിട്ടുണ്ട്. നിങ്ങളുടെ ഇടപാടുകൾ സുരക്ഷിതമാക്കുന്നതിനും സ്വയം സുരക്ഷിതമാകുന്നതിനും ഈ പൊടിക്കൈകൾ പ്രയോജനപ്പെടുത്തുക എന്നാണ് ബാങ്ക് ട്വിറ്ററിലൂടെ ഉപഭോക്താക്കളെ അറിയിച്ചിരിക്കുന്നത്.

എസ്‌ബി‌ഐ നിർദ്ദേശിച്ച മുൻകരുതലുകൾ

• എടിഎം റൂം ആരെങ്കിലും ഉപയോഗിച്ചു കൊണ്ടിരിക്കുകയാണെങ്കിൽ അത് ഉപയോഗിക്കുന്നത് ഒഴിവാക്കുക.
• എല്ലായ്പ്പോഴും സാനിറ്റൈസറോ സോപ്പോ ഉപയോഗിച്ച് കൈകൾ ശുദ്ധീകരിക്കുക
• എടിഎം മുറിയിൽ സ്പർശിക്കുന്ന സ്ഥലങ്ങൾ ഒഴിവാക്കുക.
• നിങ്ങൾക്ക് എന്തെങ്കിലും തരത്തിലുള്ള രോഗലക്ഷണങ്ങൾ ഉണ്ടെങ്കിൽ എടിഎം ഉപയോഗിക്കുന്നത് ഒഴിവാക്കുക.
• തുമ്മുകയോ ചുമ ചെയ്യുകയോ ചെയ്യുമ്പോൾ കൈമുട്ട് അല്ലെങ്കിൽ തൂവാല കൊണ്ട് വായും മൂക്കും മൂടുക
• ഉപയോഗിച്ച ടിഷ്യു പേപ്പറുകളും മാസ്കുകളും എടിഎം മുറിയിൽ നിക്ഷേപിക്കുന്നത് ഒഴിവാക്കുക
• പണവുമായി ബന്ധപ്പെട്ട ഇടപാടുകൾക്ക് എസ്‌ബി‌ഐയുടെ ഡിജിറ്റൽ പ്ലാറ്റ്ഫോമുകളായ യോനോ, ഐ‌എൻ‌ബി, ഭീം, എസ്‌ബി‌ഐ മുതലായവ ഉപയോഗിക്കുക