ദീപാവലി ബലിപ്രതിപാഡ: ബി‌എസ്‌ഇയ്ക്കും എൻ‌എസ്‌ഇയ്ക്കും ഇന്ന് അവധി

ദീപാവലി ബലിപ്രതിപാഡ ദിനമായ ഇന്ന് നാഷണൽ സ്റ്റോക്ക് എക്സ്ചേഞ്ച് ഓഫ് ഇന്ത്യയ്ക്കും (എൻ‌എസ്‌ഇ) ബി‌എസ്‌ഇയ്ക്കും ഇന്ന് അവധിയാണ്. മെറ്റൽ, ബുള്ളിയൻ എന്നിവയുൾപ്പെടെ എല്ലാ മൊത്ത ചരക്ക് വിപണികളും ഇന്ന് അടച്ചു. ഫോറെക്സ്, കമ്മോഡിറ്റി ഫ്യൂച്ചേഴ്സ് മാർക്കറ്റുകളിലും ഇന്ന് വ്യാപാരങ്ങൾ നടക്കില്ല.

ഓഹരി വിപണി മികച്ച നേട്ടത്തിലാണ് പുതുവർഷ സംവത് 2077 ആരംഭിച്ചത്. ബെഞ്ച്മാർക്ക് സൂചികകൾ മുഹൂർത്ത വ്യാപാര ദിനത്തിൽ മികച്ച നേട്ടത്തിൽ ക്ലോസ് ചെയ്തു. നിഫ്റ്റി 12,750 ന് മുകളിലാണ് വ്യാപാരം അവസാനിപ്പിച്ചത്. സെൻസെക്സ് 194.98 പോയിൻറ് അഥവാ 0.45 ശതമാനം ഉയർന്ന് 43,637.98 ൽ എത്തി. നിഫ്റ്റി 50.60 പോയിന്റ് അഥവാ 0.40 ശതമാനം ഉയർന്ന് 12,770.60 ൽ എത്തി.

കഴിഞ്ഞ കുറച്ച് മാസങ്ങളായി വിപണിയിൽ പങ്കാളിത്തം വർദ്ധിച്ചതായാണ് നിരീക്ഷകരുടെ വിലയിരുത്തൽ. ഇത് മുഹൂർത്ത വ്യാപാരത്തിലും തുടർന്നു. എല്ലാ മേഖലാ സൂചികകളും മുഹൂർത്ത വ്യാപാരത്തിൽ നേട്ടത്തിലാണ് വ്യാപാരം നടത്തിയത്. നിഫ്റ്റി മിഡ്‌ക്യാപ് സൂചിക 0.6 ശതമാനവും സ്‌മോൾകാപ്പ് 0.8 ശതമാനവും ഉയർന്നു.

ബി‌പി‌സി‌എൽ, ഐ‌ഒ‌സി, ടാറ്റ മോട്ടോഴ്സ്, എച്ച്ഡി‌എഫ്സി ലൈഫ്, സൺ ഫാർമ എന്നിവയാണ് നിഫ്റ്റിയിൽ ഏറ്റവും മികച്ച നേട്ടമുണ്ടാക്കിയത്. ഹിൻഡാലോ, ഹീറോ മോട്ടോകോർപ്പ്, ജെഎസ്ഡബ്ല്യു സ്റ്റീൽ, എസ്‌ബി‌ഐ, ബജാജ് ഫിനാൻസ് എന്നിവയ്ക്കാണ് ഏറ്റവും കൂടുതൽ നഷ്ടം നേരിട്ടത്.