എല്ലാവരും ആരോഗ്യ സേതു മൊബൈൽ അപ്പ് ഡൗൺലോഡ് ചെയ്യണമെന്ന് നരേന്ദ്ര മോദി

ഇന്ത്യയിൽ കൊറോണ വൈറസ് പടർന്നുപിടിക്കുന്നതിനെ ചെറുക്കുന്നതിനായി സർക്കാർ അടുത്തിടെ അവതരിപ്പിച്ച 'ആരോഗ്യ സേതു' ട്രാക്കിംഗ് ആപ്ലിക്കേഷന്റെ പ്രാധാന്യം ഒരിയ്ക്കൽ കൂടി വ്യക്തമാക്കിയിരിക്കുകയാണ് പ്രധാനമന്ത്രി നരേന്ദ്ര മോദി. കൊവിഡ് പ്രതിരോധവുമായി ബന്ധപ്പെട്ട് പ്രധാനമന്ത്രി മുന്നോട്ട് വച്ച ഏഴ് നിര്‍ദ്ദേശങ്ങളിലൊന്നാണിത്. ജനങ്ങൾ ആരോഗ്യ സേതു മൊബൈൽ അപ്പ് ഡൗൺലോഡ് ചെയ്ത് ആരോഗ്യ വകുപ്പിന്റെ നിര്‍ദ്ദേശങ്ങൾ പിന്തുടരണമെന്നാണ് പ്രധാനമന്ത്രി വ്യക്തമാക്കിയിരിക്കുന്നത്.

ഇ-പാസ്

കൊവിഡ് -19 നെതിരെ പോരാടാന്‍ ട്രാക്കിങ് ആപ്ലിക്കേഷൻ ഒരു അവശ്യ ഉപകരണമാണെന്ന് മോദി കഴിഞ്ഞ ദിവസം വ്യക്തമാക്കിയിരുന്നു. ഒരു സ്ഥലത്ത് നിന്ന് മറ്റൊരിടത്തേക്ക് യാത്ര ചെയ്യാൻ ഇ-പാസ് ആയി ആരോഗ്യ സേതു ആപ് ഉപയോഗിക്കാം. ഏപ്രിൽ 14 ന് അവസാനിപ്പിക്കാൻ ഉദ്ദേശിച്ചിരുന്ന 21 ദിവസത്തെ ലോക്ഡൗൺ സാഹചര്യത്തെക്കുറിച്ച് സംസ്ഥാന മുഖ്യമന്ത്രിമാരുമായി നടത്തിയ വിഡിയോ കോൺഫറൻസ് മീറ്റിങ്ങിലാണ് പ്രധാനമന്ത്രി മോദി ആരോഗ്യ സേതുവിന്റെ സാധ്യതകളെ കുറിച്ച് സംസാരിച്ചത്.

ഡൌൺലോഡ് ചെയ്യാം

ആരോഗ്യ സേതു ആപ്പ് എവിടെ നിന്ന് ഡൗണ്‍ലോഡ് ചെയ്യാം? നിങ്ങള്‍ ഒരു ആന്‍ഡ്രോയ്ഡ് ഉപയോക്താവാണെങ്കില്‍, നിങ്ങള്‍ക്ക് ഗൂഗിള്‍ പ്ലേസ്റ്റോറില്‍ നിന്ന് ആരോഗ്യ സേതു ആപ്ലിക്കേഷന്‍ ഡൗണ്‍ലോഡ് ചെയ്യാവുന്നതാണ്. ഐഫോണ്‍ ഉപയോക്താക്കള്‍ ആപ്പിളിന്റെ ആപ്പ് സ്റ്റോറില്‍ നിന്ന് ഇത് ഡൗണ്‍ലോഡ് ചെയ്‌തെടുക്കാം.

നിങ്ങൾ സേഫ് ആണോ?

'ആരോഗ്യ സേതു' ട്രാക്കിങ് ആപ്ലിക്കേഷൻ ഫോണിന്റെ ജിപിഎസ് സിസ്റ്റവും ബ്ലൂടൂത്തും ഉപയോഗിച്ച് കൊറോണ വൈറസ് അണുബാധ ട്രാക്കുചെയ്യാൻ സഹായിക്കുകയും സഹായിക്കുന്ന വിവരങ്ങൾ നൽകുകയും ചെയ്യും. നിങ്ങൾ ഒരു കോവിഡ് -19 രോഗബാധിതനായ വ്യക്തിയുടെ സമീപത്താണോ അല്ലയോ എന്ന് നിർണ്ണയിക്കാനും ഇതു വഴി സാധിക്കും. ലൊക്കേഷൻ ഡേറ്റകൾ ഉപയോഗിച്ചാണ് നിങ്ങൾക്ക് ചുറ്റുമുള്ള പ്രദേശത്തെക്കുറിച്ച് കൃത്യമായ വിവരങ്ങൾ നൽകുന്നത്. മാത്രമല്ല, നിങ്ങൾ രോഗബാധിതനായ വ്യക്തിയിൽ നിന്ന് ആറടി ദൂരെയാണോ ഉള്ളതെന്ന് നിർണ്ണയിക്കാൻ ബ്ലൂടൂത്തിന്റെ സേവനവും ആപ്പിലുണ്ട്.

11 ഭാഷകൾ

ആരോഗ്യ സേതു ആപ്ലിക്കേഷൻ 11 ഭാഷകളിൽ ലഭ്യമാണ്. ആപ്ലിക്കേഷൻ ഡൗൺലോഡു ചെയ്‌തു കഴിഞ്ഞാൽ, മൊബൈൽ നമ്പറിൽ രജിസ്റ്റർ ചെയ്യേണ്ടതുണ്ട്. പിന്നീട്, നിങ്ങളുടെ ആരോഗ്യ സ്ഥിതിവിവരക്കണക്കുകളും മറ്റ് യോഗ്യതാപത്രങ്ങളും നൽകുന്നതിന് ആപ്ലിക്കേഷനിൽ ഓപ്ഷൻ ഉണ്ടായിരിക്കും. ട്രാക്കിങ് പ്രാപ്തമാക്കുന്നതിന്, നിങ്ങളുടെ ലൊക്കേഷനും ബ്ലൂടൂത്ത് സേവനങ്ങളും ഓണാക്കേണ്ടതുണ്ട്.