പോസ്റ്റോഫീസ് വാഗ്ദാനം ചെയ്യുന്ന ഏറ്റവും മികച്ച ചെറുകിട സമ്പാദ്യ പദ്ധതികളിലൊന്നാണ് കെവിപി എന്നറിയപ്പെടുന്ന കിസാൻ വികാസ് പത്ര. നിലവിൽ, ഇത് പ്രതിവർഷം 6.9% പലിശനിരക്ക് വാഗ്ദാനം ചെയ്യുന്നു. നിലവിലെ പലിശ നിരക്കിൽ നിങ്ങളുടെ പണം ഇരട്ടിയാക്കാൻ കെവിപിക്ക് 124 മാസം അഥവാ 10 വർഷവും നാല് മാസവും എടുക്കും. ഒരു കെവിപി അക്കൌണ്ട് ചുരുങ്ങിയത് 1,000 രൂപ നിക്ഷേപിച്ച് ആരംഭിക്കാനാകും. പരമാവധി നിക്ഷേപ പരിധികളൊന്നുമില്ല. കെവിപിയെക്കുറിച്ച് നിങ്ങൾ അറിയാൻ ആഗ്രഹിക്കുന്നതെല്ലാം ഇവിടെയുണ്ട്.
ആർക്കൊക്കെ അക്കൌണ്ട് തുറക്കാം?
പ്രായപൂർത്തിയായവർക്ക് ഒറ്റയ്ക്ക് ഒരു കെവിപി അക്കൗണ്ട് തുറക്കാൻ കഴിയും. മൂന്ന് മുതിർന്നവർ വരെ ചേർന്ന് സംയുക്ത അക്കൗണ്ടും തുറക്കാൻ കഴിയും. പ്രായപൂർത്തിയാകാത്തയാൾക്ക് വേണ്ടി അല്ലെങ്കിൽ ഭിന്നശേഷിയുള്ള ആൾക്ക് വേണ്ടി ഒരു രക്ഷാധികാരിക്കും കെവിപി അക്കൗണ്ട് തുറക്കാനാകും. 10 വയസ്സിന് മുകളിലുള്ള പ്രായപൂർത്തിയാകാത്തയാൾക്ക് സ്വന്തം പേരിൽ കെവിപി അക്കൗണ്ട് തുറക്കാം.
എത്ര അക്കൌണ്ടുകൾ തുറക്കാം?
സ്കീമിന് കീഴിൽ എത്ര അക്കൌണ്ടുകൾ വേണമെങ്കിലും തുറക്കാൻ കഴിയും. കെവിപിയിൽ പോസ്റ്റോഫീസ് വഴി നിക്ഷേപം ആരംഭിക്കാം. കൂടാതെ നാമനിർദ്ദേശ സേവനവും വാഗ്ദാനം ചെയ്യുന്നുണ്ട്. ഇനിപ്പറയുന്ന നിബന്ധനകൾക്ക് വിധേയമായി കാലാവധി പൂർത്തിയാകുന്നതിന് മുമ്പായി കെവിപി അക്കൌണ്ട് ക്ലോസ് ചെയ്യാവുന്നതാണ്.
നിബന്ധനകൾ
- ഒരു അക്കൗണ്ടിന്റെ അല്ലെങ്കിൽ ഒരു സംയുക്ത അക്കൌണ്ടിലെ ഏതെങ്കിലും അല്ലെങ്കിൽ എല്ലാ അക്കൌണ്ട് ഉടമകളുടെയും മരണം സംഭവിച്ചാൽ അക്കൌണ്ട് ക്ലോസ് ചെയ്യാം.
- കോടതി ഉത്തരവ് നൽകിയാൽ
- നിക്ഷേപ തീയതി മുതൽ 2 വർഷത്തിനും 6 മാസത്തിനും ശേഷം
മറ്റൊരാളിലേയ്ക്ക് മാറ്റാം
- ഇനിപ്പറയുന്ന വ്യവസ്ഥകളിൽ കെവിപി ഒരാളിൽ നിന്ന് മറ്റൊരാളിലേക്ക് മാറ്റാം
- അക്കൌണ്ട് ഉടമയ്ക്ക് മരണം സംഭവിച്ചാൽ നോമിനി/നിയമപരമായ അവകാശികൾ എന്നിവരിലേയ്ക്ക് അക്കൌണ്ട് മാറ്റാം.
- ജോയിന്റ് ഹോൾഡർക്ക് അക്കൌണ്ട് ഉടമയുടെ മരണ ശേഷം മാറ്റാം
- കോടതിയുടെ ഉത്തരവ് പ്രകാരം.
- നിർദ്ദിഷ്ട അതോറിറ്റിക്ക് അക്കൗണ്ട് പണയം വയ്ക്കുമ്പോൾ