എൽ‌ഐസി വരിക്കാർ തീർച്ചയായും അറിയേണ്ട ഏറ്റവും പുതിയ 5 പ്രഖ്യാപനങ്ങൾ

കൊറോണ വൈറസ് മഹാമാരി മൂലം പോളിസി ഉടമകൾ നേരിടുന്ന ബുദ്ധിമുട്ടുകൾ ലഘൂകരിക്കുന്നതിന്, 2020 മാർച്ച്, ഏപ്രിൽ മാസങ്ങളിലെ പ്രീമിയം അടയ്ക്കുന്നതിന് ലൈഫ് ഇൻഷുറൻസ് കോർപ്പറേഷൻ (എൽഐസി) ഇളവുകൾ പ്രഖ്യാപിച്ചു. സാധ്യമാകുന്നിടത്തെല്ലാം ഓഫീസുകൾ പ്രവർത്തിക്കുന്നുണ്ടെന്ന് എൽഐസി അറിയിച്ചു. നിലവിലെ സാഹചര്യത്തിൽ ഉപഭോക്തൃ സേവനങ്ങൾ സാധാരണഗതിയിൽ നൽകുന്നുണ്ടെന്ന് ഉറപ്പുവരുത്താൻ ജീവനക്കാർ വീട്ടിൽ ഇരുന്ന് തന്നെ പ്രവർത്തിക്കുന്നുണ്ടെന്നും കമ്പനി അറിയിച്ചു.

ഇളവ്

അന്വേഷണങ്ങൾക്കും പ്രീമിയം പേയ്മെന്റ്, പോളിസി ഓൺ‌ലൈൻ വാങ്ങൽ, മറ്റ് സേവനങ്ങൾ എന്നിവയ്ക്കായി പോളിസി ഹോൾഡർമാർക്ക് വെബ്‌സൈറ്റ് സന്ദർശിക്കാമെന്ന് എൽഐസി പറഞ്ഞു. മാർച്ച് 22 ന് ശേഷം ഗ്രേസ് പിരീഡ് അവസാനിക്കുന്ന ഫെബ്രുവരിയിലെ പ്രീമിയങ്ങളിൽ, എൽഐസി പോളിസി ഹോൾഡർമാർക്ക് ഏപ്രിൽ 15 വരെ ഇളവ് ലഭിക്കും. മിക്ക സേവനങ്ങളും ഓൺലൈനിൽ ചെയ്യാമെന്നും എൽഐസി അറിയിച്ചു.

ഓൺലൈൻ പ്രീമിയം അടയ്ക്കൽ

എൽ‌ഐ‌സിയുടെ പോളിസി ഉടമകൾക്ക് ഒരു സേവന നിരക്കും കൂടാതെ ഡിജിറ്റൽ പേയ്‌മെന്റ് ഓപ്ഷനുകൾ‌ വഴി പ്രീമിയം അടയ്‌ക്കാൻ‌ കഴിയും. മൊബൈൽ ആപ്ലിക്കേഷനായ എൽഐസി പേ ഡയറക്റ്റ് ഡൌൺലോഡ് ചെയ്തുകൊണ്ട് പ്രീമിയങ്ങൾ അടയ്ക്കാം. പ്രീമിയം അടയ്ക്കുന്നതിന് പോളിസി ഹോൾഡർമാർ വെബ്‌സൈറ്റിൽ രജിസ്റ്റർ ചെയ്യേണ്ടതില്ലെന്നും അടിസ്ഥാന വിശദാംശങ്ങൾ നൽകി നേരിട്ട് പണമടയ്ക്കാമെന്നും എൽഐസി പറഞ്ഞു.

മറ്റ് മാർഗങ്ങൾ

എല്ലാ ഐ‌ഡി‌ബി‌ഐ, ആക്‌സിസ് ബാങ്ക് ശാഖകളിലും ബ്ലോക്ക് തലത്തിൽ പ്രവർത്തിക്കുന്ന കോമൺ സർവീസ് സെന്ററുകൾ (സി‌എസ്‌സി) വഴിയും പ്രീമിയം അടയ്ക്കാം.

ഓൺലൈനിൽ ലഭ്യമായ പ്ലാനുകൾ

അഞ്ച് പ്ലാനുകൾ ഓൺലൈനിൽ ലഭ്യമാക്കിയിട്ടുണ്ടെന്ന് എൽഐസി അറിയിച്ചു

• പ്യുവർ പ്രൊട്ടക്ഷൻ പ്ലാൻ ടെക് ടേം
• ജീവൻ ശാന്തി ആന്വിറ്റി പ്ലാൻ
• കാൻസർ കവർ,
• എസ് ഐ പി പി
• നിവേഷ് പ്ലസ്

മരണ ക്ലെയിമുകൾ

കൊവിഡ് 19 മൂലമുണ്ടാകുന്ന മരണ ക്ലെയിമുകൾ മറ്റ് മരണകാരണങ്ങൾക്ക് തുല്യമായി പരിഗണിക്കുമെന്നും അടിയന്തിര അടിസ്ഥാനത്തിൽ പേയ്‌മെന്റുകൾ നടത്തുമെന്നും എൽഐസി പോളിസി ഉടമകൾക്ക് ഉറപ്പ് നൽകി. കഴിഞ്ഞ സാമ്പത്തിക വർഷത്തിൽ, 7.5 ലക്ഷത്തിലധികം മരണ ക്ലെയിമുകൾ എൽ‌ഐ‌സി തീർപ്പാക്കിയിരുന്നു. മൊത്തം മരണ ക്ലെയിമുകളുടെ 0.75 ശതമാനം മാത്രമാണ് കുടിശ്ശികയെന്നാണ് റിപ്പോർട്ടുകൾ.