ലോക കോടീശ്വരന് കാശിന് അത്യാവശ്യമോ? 3 ബില്യൺ ഡോളർ വിലമതിക്കുന്ന ആമസോൺ ഓഹരികൾ വിറ്റു

ജെഫ് ബെസോസ് ഈ ആഴ്ച തന്റെ ആമസോൺ ഓഹരികളിലെ 3 ബില്യൺ ഡോളറിലധികം വിറ്റു, ഈ വർഷം കമ്പനിയുടെ മൂല്യത്തിൽ 75% വർദ്ധനവ് രേഖപ്പെടുത്തിയിരുന്നു. എന്തുകൊണ്ടാണ് ഇത്രയധികം ഓഹരികൾ വിറ്റതെന്ന് ആമസോൺ സിഇഒ വിശദീകരിച്ചിട്ടില്ല. പക്ഷേ അദ്ദേഹം പതിവായി തന്റെ ഓഹരികൾ വിൽക്കുകയും, പലപ്പോഴും ഇത് തന്റെ ബ്ലൂ ഒറിജിൻ ബഹിരാകാശ കമ്പനിക്കും മറ്റ് സംരംഭങ്ങൾക്കും പണം കണ്ടെത്താനായി ഉപയോഗിക്കുകയുമാണ് ചെയ്യാറുള്ളത്.

നിക്ഷേപ വൈവിധ്യവത്ക്കരണം

വലിയ ആസ്തികളുള്ള കോടീശ്വരന്മാർ സാധാരണയായി അവരുടെ നിക്ഷേപ പോർട്ട്‌ഫോളിയോകൾ വൈവിധ്യവത്കരിക്കാറുണ്ട്. അതായത് എല്ലാ ആസ്തികളും ഒരേ നിക്ഷേപത്തിൽ ഒതുക്കില്ല. ഈ വർഷം ഓഗസ്റ്റ്, ഫെബ്രുവരി മാസങ്ങളിലും ബെസോസ് വലിയ അളവിൽ തന്നെ ഓഹരികൾ വിറ്റഴിച്ചിരുന്നു. ഈ വർഷം 10 ബില്യൺ ഡോളറിലധികം വിലമതിക്കുന്ന ആമസോൺ ഓഹരികൾ അദ്ദേഹം വിറ്റു. 2019ൽ ഏകദേശം 3 ബില്യൺ ഡോളർ വില മതിക്കുന്ന ഓഹരികൾ വിറ്റിരുന്നു.

ഓഹരി വിൽപ്പന

ബെസോസിന്റെ ഓഹരി വിൽപ്പനയെക്കുറിച്ച് ആമസോൺ ഇതുവരെ പ്രതികരിച്ചില്ല. ബ്ലൂ ഒറിജിന് ധനസഹായം ചെയ്യുന്നതിനായി പ്രതിവർഷം ഒരു ബില്യൺ ഡോളർ മൂല്യമുള്ള ഓഹരികൾ വിൽക്കുന്നുണ്ടെന്ന് ബെസോസ് മുമ്പ് പറഞ്ഞിരുന്നു.കാലാവസ്ഥാ വ്യതിയാനത്തെ ചെറുക്കുന്നതിനുള്ള പദ്ധതിയുടെ ഭാഗമായി അദ്ദേഹം അടുത്തിടെ 10 ബില്യൺ ഡോളർ ഫണ്ട് സമാഹരിച്ചിരുന്നു.

ബഹിരാകാശ ടൂറിസം

കഴിഞ്ഞ മാസം ബ്ലൂ ഒറിജിൻ ബഹിരാകാശ ടൂറിസം റോക്കറ്റ് വിക്ഷേപിച്ചിച്ചിരുന്നു. ന്യൂ ഷെപ്പേർഡ് എന്നാണ് വാഹനത്തെ വിളിക്കുന്നത്. ഇത് ന്യൂ ഷെപ്പേർഡിന്റെ പതിമൂന്നാമത്തെ പരീക്ഷണ പറക്കലായിരുന്നു. എന്നാൽ ഇതുവരെ മനുഷ്യരുമായി ബഹിരാകാശത്തേയ്ക്ക് പറന്നിട്ടില്ല.

കോടീശ്വര പട്ടികയിൽ ഒന്നാമൻ

വലിയ അളവിൽ ഓഹരി വിറ്റഴിക്കൽ നടത്തിയിട്ടും ബ്ലൂംബെർഗ് കോടീശ്വര പട്ടികയിൽ ബെസോസ് തന്നെയാണ് ലോകത്തിലെ ഏറ്റവും ധനികനായ വ്യക്തി. അദ്ദേഹത്തിന്റെ ആസ്തി 191 ബില്യൺ ഡോളറാണ്. ഈ വർഷം തുടക്കം മുതൽ ഇതുവരെ 76 ബില്യൺ ഡോളറിന്റെ വർധനവാണ് ആസ്തിയിൽ ഉണ്ടായിരിക്കുന്നത്.