ജിയോ 5 ജി വിപ്ലവം; 2021ന്റെ രണ്ടാം പകുതിയിൽ തുടക്കം കുറിക്കുമെന്ന് മുകേഷ് അംബാനി

2021 ന്റെ രണ്ടാം പകുതിയിൽ ജിയോ 5ജി സേവനം ആരംഭിക്കുമെന്ന് റിലയൻസ് ജിയോ ഇൻഫോകോം ലിമിറ്റഡ് ചെയർമാൻ മുകേഷ് അംബാനി പറഞ്ഞു. അഞ്ചാം തലമുറ വയർലെസ് സേവനത്തിനായുള്ള നടപടികൾ ആരംഭിച്ചതായി അംബാനി കൂട്ടിച്ചേർത്തു. 5 ജി സേവനങ്ങൾ ഉടൻ ആരംഭിക്കുന്നത് രാജ്യത്തിന് ആവശ്യമാണെന്ന് ഇന്ത്യ മൊബൈൽ കോൺഗ്രസിന്റെ നാലാം പതിപ്പിൽ സംസാരിച്ച അംബാനി പറഞ്ഞു.

5 ജി വിപ്ലവം

2021 ന്റെ രണ്ടാം പകുതിയിൽ ജിയോ ഇന്ത്യയിൽ 5 ജി വിപ്ലവത്തിന് തുടക്കമിടുമെന്ന് ഉറപ്പു നൽകുന്നതായി മുകേഷ് അംബാനി പറഞ്ഞു. തദ്ദേശീയമായി വികസിപ്പിച്ചെടുത്ത നെറ്റ്‌വർക്ക്, ഹാർഡ്‌വെയർ, സാങ്കേതിക ഘടകങ്ങൾ ഇതിന് കരുത്തേകുമെന്നും അംബാനി പറഞ്ഞു. സ്പെക്ട്രം വിറ്റാലുടൻ റിലയൻസ് ജിയോ 5 ജി ആരംഭിക്കുമെന്ന് പറയുമ്പോഴും എതിരാളികളായ ഭാരതി എയർടെൽ ലിമിറ്റഡും വോഡഫോൺ ഐഡിയ ലിമിറ്റഡും വിശ്വസിക്കുന്നത് 5 ജി ഇന്ത്യയിൽ രണ്ട് വർഷത്തിന് ശേഷമേ ആരംഭിക്കൂവെന്നാണ്.

പ്രവർത്തനങ്ങൾ ആരംഭിച്ചു

5 ജി വികസിപ്പിക്കുന്നതിനും അതിവേഗ നെറ്റ്‌വർക്കിനെ ലോകത്തിലെ രണ്ടാമത്തെ വലിയ മൊബൈൽ വിപണിയിലേക്ക് എത്തിക്കുന്നതിനുള്ള ശ്രമങ്ങൾ ത്വരിതപ്പെടുത്തുന്നതിനും യുഎസ് ആസ്ഥാനമായുള്ള ക്വാൽകോം ഇൻ‌കോർപ്പറേറ്റുമായി പ്രവർത്തിക്കുകയാണെന്ന് ഒക്ടോബറിൽ ജിയോ പ്ലാറ്റ്ഫോംസ് ലിമിറ്റഡ് പ്രഖ്യാപിച്ചിരുന്നു.

ഇന്ത്യൻ സാങ്കേതികവിദ്യ

ജിയോ 5 ജി ഇതിനകം വികസിപ്പിച്ചെടുത്തിട്ടുണ്ടെന്നും 100%വും രാജ്യത്ത് തന്നെയുള്ള സാങ്കേതികവിദ്യ ഉപയോഗിച്ചാണ് ലോകോത്തര നിലവാരമുള്ള 5 ജി സേവനം ഇന്ത്യയിൽ ആരംഭിക്കുകയെന്നും ജൂലൈയിൽ നടന്ന റിലയൻസിന്റെ 43-ാമത് വാർഷിക പൊതുയോഗത്തിൽ അംബാനി വ്യക്തമാക്കിയിരുന്നു. ടെലികോമുകളുടെ സംയോജിത നെറ്റ്‌വർക്ക് ഇൻഫ്രാസ്ട്രക്ചർ കാരണം ജിയോയ്ക്ക് 4 ജി നെറ്റ്‌വർക്ക് 5 ജിയിലേക്ക് എളുപ്പത്തിൽ അപ്‌ഗ്രേഡു ചെയ്യാനാകുമെന്നും അദ്ദേഹം പറഞ്ഞു.

നേട്ടങ്ങൾ

സ്മാർട്ട്‌ഫോണുകൾ, ലാപ്‌ടോപ്പുകൾ, വെർച്വൽ റിയാലിറ്റി ഉൽപ്പന്നങ്ങൾ, ഇന്റർനെറ്റ് ഓഫ് തിംഗ്സ് (ഐഒടി) സൊല്യൂഷനുകൾ എന്നിവയിലുടനീളം വേഗത്തിലുള്ള ഡാറ്റ, മെച്ചപ്പെട്ട ഡിജിറ്റൽ സേവനങ്ങൾ എന്നിവ ലഭിക്കാൻ 5 ജി സാങ്കേതികവിദ്യ ഉപയോക്താക്കളെ സഹായിക്കും.