ദീപാവലി മുഹൂർത്ത വ്യാപാരം 2020; ഓഹരി വിപണിയിൽ സർവ്വകാല റെക്കോർഡ്, എയർടെൽ ഓഹരി വില കുതിച്ചുയർന്നു

ഹിന്ദു പുതുവർഷമായ വിക്രം സംവത് 2077ന്റെ ആരംഭത്തിന്റെ ഭാഗമായി ഓഹരി വിപണിയിൽ നടത്തുന്ന മുഹൂർത്ത വ്യാപാരം ആരംഭിച്ചു. സെൻസെക്സ് 43,815 പോയിന്റിൽ വ്യാപാരം ആരംഭിച്ചപ്പോൾ നിഫ്റ്റി 12,800 ന് മുകളിലാണ് തുറന്നത്. ബജാജ് ഫിൻ‌സെർവ്, ടാറ്റാ സ്റ്റീൽ, ഇൻ‌ഡസ് ഇൻ‌ഡ് ബാങ്ക് എന്നിവയാണ് സെൻ‌സെക്സിൽ ഏറ്റവും കൂടുതൽ നേട്ടമുണ്ടാക്കുന്ന ഓഹരികൾ. ഭാരതി എയർടെൽ, എസ്‌ബി‌ഐ, ലാർസൻ ആൻഡ് ട്യൂബ്രോ എന്നിവയും തൊട്ടു പിന്നിലുണ്ട്.

മുഹൂർത്ത വ്യാപാരം ആരംഭിച്ചു, ഓഹരി വിപണിയിൽ സർവ്വകാല റെക്കോർഡ്

നെസ്‌ലെ ഇന്ത്യ, പവർഗ്രിഡ്, എൻ‌ടി‌പി‌സി എന്നിവ മാത്രമാണ് സെൻസെക്സിൽ നഷ്ടം രേഖപ്പെടുത്തിയ ഓഹരികൾ. മുഹൂർത്ത വ്യാപാരത്തിൽ 12 ബി‌എസ്‌ഇ 200ലെ ഓഹരികൾ 52 ആഴ്ചയിലെ ഏറ്റവും ഉയർന്ന നിരക്കിലെത്തി. അദാനി എന്റർപ്രൈസസ്, അദാനി ഗ്രീൻ, ഇൻഡിഗോ, ഐഷർ, അൾട്രാടെക് സിമൻറ്, നൌക്കരി എന്നിവ ഇതിൽപ്പെടുന്നു.

മുഹൂർത്ത വ്യാപാരത്തിന് തൊട്ടുമുമ്പുള്ള പ്രീ-ഓപ്പൺ സെഷനിൽ തന്നെ സെൻസെക്സും നിഫ്റ്റിയും കുതിച്ചുയർന്നിരുന്നു. സെൻസെക്സ് 400 പോയിൻറ് ഉയർന്ന് 43,900ലെത്തിയപ്പോൾ നിഫ്റ്റി 12,800 ന് മുകളിലാണ് പ്രീ ഓപ്പൺ സെഷനിൽ വ്യാപാരം നടത്തിയത്. 

ഇന്ത്യയിലെ ഓഹരി വിപണികളിൽ ഈ ദിവസം വ്യാപാരം നടത്തുന്നത് ശുഭസൂചനയായാണ് കണക്കാക്കുന്നത്. ഈ പ്രത്യേക സമയം നടത്തുന്ന വ്യാപാരം സമൃദ്ധിയും ഭാഗ്യവും സമ്പത്തും നൽകുമെന്നാണ് വിശ്വസിക്കപ്പെടുന്നത്. 1957 മുതൽ ബി‌എസ്‌ഇ മുഹൂർത്ത വ്യാപാരം നടത്തുന്നുണ്ട്. 1992 മുതലാണ് എൻ‌എസ്‌ഇ മുഹൂർത്ത വ്യാപാരം ആരംഭിച്ചത്. 6.30ന് നിഫ്റ്റി ബാങ്ക് സൂചിക 0.92 ശതമാനം ഉയർന്ന് 28,726 പോയിന്റിലെത്തി. നിഫ്റ്റി പ്രൈവറ്റ് ബാങ്ക് സൂചിക 0.94 ശതമാനം ഉയർന്നു.

വ്യാപാരം പകുതിയോട് അടുത്തപ്പോൾ ബി‌എസ്‌ഇ മിഡ്‌ക്യാപ്പ് 0.83 ശതമാനവും ബി‌എസ്‌ഇ സ്‌മോൾക്യാപ്പ് 0.89 ശതമാനവും ഉയർന്നു. സെൻസെക്സ് 0.67 ശതമാനം ഉയർന്നു. വ്യാപാര സമയത്ത് നിഫ്റ്റി ഫാർമ സൂചിക 0.45 ശതമാനം ഉയർന്നു. കാഡില ഹെൽത്ത് കെയർ, ആൽക്കെം ലബോറട്ടറീസ്, ടോറന്റ് ഫാർമ, ലുപിൻ എന്നിവയാണ് മികച്ച നേട്ടം കൈവരിച്ചത്. 

ഭാരതി എയർടെൽ ഓഹരി വില കുതിച്ചുയർന്നു. ഓഹരി വില 1.48 ശതമാനം ഉയർന്ന് 482 രൂപയായി.  സ്നോമാൻ ലോജിസ്റ്റിക്സ് ഓഹരി വില 20% ഉയർന്ന് അപ്പർ സർക്യൂട്ടിലെത്തി.