യഥാർത്ഥ ജിഡിപി 2021 സാമ്പത്തിക വർഷം 10.9 ശതമാനം ചുരുങ്ങാൻ സാധ്യതയുണ്ടെന്ന് എസ്‌ബി‌ഐ റിപ്പോ‍ർട്ട്

ഏപ്രിൽ-ജൂൺ പാദത്തിൽ രാജ്യത്തിന്റെ സമ്പദ്‌വ്യവസ്ഥ റെക്കോർഡ് നിരക്കായ 23.9 ശതമാനം ഇടിവ് രേഖപ്പെടുത്തിയതിനെ തുടർന്ന്, 2021 സാമ്പത്തിക വർഷത്തിലെ യഥാർത്ഥ ജിഡിപി 10.9 ശതമാനം കുറയുമെന്ന് സ്റ്റേറ്റ് ബാങ്ക് ഓഫ് ഇന്ത്യ ഗവേഷണ റിപ്പോർട്ട് - ഇക്കോവ്രാപ്പ് പറയുന്നു. നടപ്പു സാമ്പത്തിക വർഷത്തിൽ യഥാർത്ഥ മൊത്ത ആഭ്യന്തര ഉത്പാദനം (ജിഡിപി) (-) 6.8 ശതമാനമായിരിക്കുമെന്ന് നേരത്തെ കണക്കാക്കിയിരുന്നു.

ഇടിവ് പ്രതീക്ഷിക്കാം

ആദ്യ പാദത്തിലെ ജിഡിപി ഇടിവ് കഴിഞ്ഞ ജനുവരി മുതൽ മാർച്ച് വരെയുള്ള പാദത്തിലെ 3.1 ശതമാനം വളർച്ചയും ഒരു വർഷം മുമ്പ് ഇതേ കാലയളവിലെ 5.2 ശതമാനം വളർച്ചയുമായാണ് താരതമ്യപ്പെടുത്തിയത്. എസ്ബിഐയുടെ പ്രാഥമിക എസ്റ്റിമേറ്റ് പ്രകാരം 2021 സാമ്പത്തിക വർഷത്തിന്റെ നാല് പാദങ്ങളും നെഗറ്റീവ് ജിഡിപി വളർച്ച കാണിക്കുമെന്നാണ് പ്രതീക്ഷിക്കുന്നത്. കൂടാതെ മുഴുവൻ വർഷത്തെയും വളർച്ചയുടെ ഇടിവ് ഇരട്ട അക്കത്തിൽ (ഏകദേശം 10.9 ശതമാനം) ആയിരിക്കുമെന്നും ഗവേഷണ റിപ്പോർട്ടിൽ പറയുന്നു.

പ്രവചനം

രണ്ടാം പാദത്തിൽ യഥാർത്ഥ ജിഡിപി (-) 12 ശതമാനം മുതൽ (-) 15 ശതമാനം വരെ കുറയുമെന്നാണ് പ്രതീക്ഷിക്കുന്നത്. അതേസമയം മൂന്നാം പാദത്തിൽ ജിഡിപി (-) 5 ശതമാനത്തിനും (-) 10 ശതമാനത്തിനും ഇടയിലായിരിക്കുമെന്നും റിപ്പോ‍ർട്ട വ്യക്തമാക്കുന്നു. നാലാം പാദത്തിൽ (-) 2 ശതമാനം മുതൽ (-) 5 ശതമാനം വരെയാണ് ഇടിവ് പ്രതീക്ഷിക്കുന്നത്.

കൊവിഡ് പ്രതിസന്ധി

കൊവിഡ് -19 മഹാമാരി പശ്ചാത്തലത്തിൽ 2020 മാർച്ച് 25 ന് രാജ്യവ്യാപകമായി ലോക്ക്ഡൗൺ ഏർപ്പെടുത്തിയതിനെത്തുടർന്ന് രാജ്യത്തിന്റെ ജിഡിപി വളർച്ച 23.9 ശതമാനമായി കുറഞ്ഞുവെന്ന് റിപ്പോർട്ടിൽ പറയുന്നു. ഉപയോഗയോഗ്യതയില്ലാത്തതിനാൽ നിക്ഷേപ ആവശ്യകത വീണ്ടെടുക്കാത്തതിനാൽ, മൊത്തം ജിഡിപി കണക്കിൽ സ്വകാര്യ ഉപഭോഗച്ചെലവിന്റെ വിഹിതം ഉയരുന്നത് തുടരുമെന്ന് റിപ്പോർട്ടിൽ പറയുന്നു. നടപ്പു സാമ്പത്തിക വർഷത്തിൽ ശരാശരി 26 ശതമാനം വർധനവാണ് ഇത് സൂചിപ്പിക്കുന്നത്.

ഇടിവുകൾ

ആരോഗ്യം, വിദ്യാഭ്യാസം തുടങ്ങിയ വ്യക്തിഗത ഉപഭോഗ ചെലവ് ഘടകങ്ങൾക്ക് കീഴിലുള്ള ചെലവ് രീതികളെ മഹാമാരി സാരമായി ബാധിച്ചുവെന്നും റിപ്പോർട്ടിൽ പറയുന്നു. എന്നിരുന്നാലും, ഈ ഇടിവുകൾക്കിടയിലും ചില നേട്ടങ്ങൾ എടുത്തു പറയേണ്ടതാണ്. അവ എന്തൊക്കെയാണെന്ന് നോക്കാം.

നേട്ടങ്ങൾ

ആർ‌ബി‌ഐ മേഖല തിരിച്ചുള്ള ക്രെഡിറ്റ് ഡാറ്റ സൂചിപ്പിക്കുന്നത് ജൂലൈ മാസത്തിൽ വ്യവസായം ഒഴികെ മറ്റെല്ലാ പ്രധാന മേഖലകളിലും ക്രെഡിറ്റ് വർദ്ധിച്ചു എന്നാണ്. എം‌എസ്‌ഇ (മൈക്രോ, ചെറുകിട സംരംഭങ്ങൾ), കാർഷിക, അനുബന്ധ, വ്യക്തിഗത വായ്പകൾക്കുള്ള വായ്പയിൽ ഗണ്യമായ വർധനയുണ്ടായിയെന്ന് റിപ്പോർട്ടിൽ പറയുന്നു. രണ്ടാമതായി, ആദ്യ പാദത്തിൽ പുതിയ ചില പദ്ധതി പ്രഖ്യാപനങ്ങളും നടന്നിട്ടുണ്ട്. റോഡ്‌വേ, അടിസ്ഥാന രാസവസ്തുക്കൾ, വൈദ്യുതി, കമ്മ്യൂണിറ്റി സേവനങ്ങൾ, ആശുപത്രികൾ, ജല മലിനജല പൈപ്പ്ലൈനുകൾ എന്നിവ ഇതിൽ ഉൾപ്പെടുന്നു. നിർമാണം, വ്യാപാരം, ഹോട്ടലുകൾ, വ്യോമയാന തുടങ്ങിയ മേഖലകളെ പുനരുജ്ജീവിപ്പിക്കേണ്ടതുണ്ടെന്ന് ഗവേഷണ റിപ്പോർട്ട് പറയുന്നു.