വ്യോമയാന മേഖലയില്‍ വന്‍ പദ്ധതികളുമായി ടാറ്റ; എയര്‍ ഏഷ്യാ ഇന്ത്യയിലെ ഓഹരി പങ്കാളിത്തം ഉയര്‍ത്തും

മുംബൈ: വിമാനക്കമ്പനിയായ എയര്‍ ഏഷ്യ ഇന്ത്യയിലുള്ള ഓഹരി പങ്കാളിത്തം വര്‍ദ്ധിപ്പിക്കുന്നതായി റിപ്പോര്‍ട്ട്. 32.67 ശതമാനം കൂടി സ്വന്തമാക്കി ഓഹരി വര്‍ദ്ധിപ്പിക്കാനാണ് ടാറ്റയുടെ നീക്കം. ഇതിനായി 3.76 കോടി ഡോളര്‍ ടാറ്റ ചെലവഴിക്കും. കൂടുതല്‍ ഓഹരി കൂടി ടാറ്റ സ്വന്തമാക്കുന്നതോടെ ടാറ്റയുടെ പങ്കാളിത്തം 83.67 ശതമാനം ആയി ഉയരും.

മലേഷ്യ ആസ്ഥാനമാക്കി പ്രവര്‍ത്തിക്കുന്ന ഏഷ്യര്‍ ഏഷ്യയുടെ സബ്‌സിഡറി കമ്പനിയാണ് എയര്‍ ഏഷ്യ ഇന്ത്യ. ഇതിന്റെ 49 ശതമാനം ഓഹരിയും ബംഗളൂരു ആസ്ഥാനമായി പ്രവര്‍ത്തിക്കുന്ന എയര്‍ ഏഷ്യ ഇന്ത്യയുടെ കൈവശമാണുള്ളത്.

അതേസമയം, ഇന്ത്യയുടെ ദേശീയ വിമാനക്കമ്പനിയായ എയര്‍ ഇന്ത്യയെ വാങ്ങാന്‍ പ്രാഥമിക ബിഡ് സമര്‍പ്പിച്ചതിന് പിന്നാലെയാണ് എയര്‍ ഏഷ്യയുടെ ഓഹരികള്‍ വര്‍ദ്ധിപ്പിക്കാന്‍ ടാറ്റ ഗ്രൂപ്പ് തീരുമാനിച്ചത്. മാസങ്ങള്‍ നീണ്ട ചര്‍ച്ചകള്‍ക്ക് ശേഷമാണ് ടാറ്റ ഇങ്ങനെയൊരു തീരുമാനം കൈക്കൊണ്ടത്. കൂടാതെ എയര്‍ ഏഷ്യ തങ്ങളുടെ ഇന്ത്യയിലെ സ്വാധീനം കുറയ്ക്കുന്നതായും റിപ്പോര്‍ട്ടുകളുണ്ട്.

ടാറ്റയുടെ വ്യോമയാന മേഖലയിലെ ബിസ്‌നസ് ഏകീകരിക്കുന്നതിനുള്ള നിരവധി നടപടികളില്‍ ആദ്യത്തേതായാണ് വ്യവസായിക നിരീക്ഷകര്‍ ഇപ്പോഴത്തെ നീക്കത്തെ കാണുന്നത്. എയര്‍ ഏഷ്യയ്ക്ക് പുറമെ ഫുള്‍ സര്‍വീസ് വിമാനക്കമ്പനിയായ വിസ്താരയില്‍ 51 ശതമാനം ഓഹരികളും ടാറ്റയ്ക്കുണ്ട്.