<p><br />ദില്ലി: എംപ്ലോയീസ് പ്രൊവിഡന്റ് ഫണ്ട്(ഇപിഎഫ്) നിക്ഷേപങ്ങളുടെ പലിശനിരക്കില്‍ ഗണ്യമായ കുറവു വരുത്താന്‍ കേന്ദ്രം തീരുമാനിച്ചു. നിലവിലുള്ള 9.5 ശതമാനത്തില്‍ നിന്നും 8.25 ആയി കുറയ്ക്കാനാണ് തീരുമാനിച്ചിട്ടുള്ളത്. രാജ്യത്തെ അഞ്ചുകോടിയോളം തൊഴിലാളികളാണ് ഇപിഎഫിന്റെ പരിധിയിലുള്ളത്.<br /><br />ധനകാര്യമന്ത്രാലയത്തിന്റെ നിര്‍ദ്ദേശമനുസരിച്ച് തൊഴില്‍ മന്ത്രാലയമാണ് ഇതുസംബന്ധിച്ച ഉത്തരവിറക്കിയത്. ഇപിഎഫ് ഓഫിസിനു നല്‍കാന്‍ കഴിയുന്ന പലിശ നിരക്ക് തൊഴിലാളികള്‍ക്ക് നല്‍കിയാല്‍ മതിയെന്ന നിലപാടാണ് ധനകാര്യമന്ത്രാലയം സ്വീകരിച്ചത്.<br /><br />കഴിഞ്ഞ കുറെ മാസങ്ങളായി ഇപിഎഫ് നിരക്കില്‍ കുറവ് വരുത്താന്‍ സര്‍ക്കാര്‍ ശ്രമിച്ചിരുന്നെങ്കിലും ട്രസ്റ്റികളുടെ കടുത്ത എതിര്‍പ്പിനെ തുടര്‍ന്ന് മാറ്റിവയ്ക്കുകയായിരുന്നു.<br /><br />സര്‍ക്കാര്‍ തീരുമാനത്തിനെതിരേ പ്രക്ഷോഭം തുടങ്ങുമെന്ന് വിവിധ തൊഴിലാളി സംഘടനകള്‍ പ്രഖ്യാപിച്ചിട്ടുണ്ട്. ഇതോടെ ബജറ്റിന്റെ ബഹളം പൂര്‍ത്തിയായാല്‍ സമരവുമായി തൊഴിലാളികള്‍ തെരുവിലിറങ്ങുമെന്ന കാര്യം ഉറപ്പായി.</p>