അവധി ആഘോഷിക്കാൻ കാശുണ്ടാക്കാം; എസ്ബിഐയുടെ പുതിയ പദ്ധതിയെക്കുറിച്ച് അറിയേണ്ട കാര്യങ്ങൾ

അവധിക്ക് ടൂർ പോകാൻ കാശില്ലെന്ന വിഷമം വേണ്ട. മുൻകൂട്ടി നിക്ഷേപം നടത്തിയാൽ ഈസിയായി ടൂർ പോകാനുള്ള കാശുണ്ടാം. ഇതിന് അവസരമൊരുക്കുന്ന എസ്ബിഐയുടെ റിക്കറിം​ഗ് ഡിപ്പോസിറ്റിനെക്കുറിച്ച് നിങ്ങൾക്ക് അറിയാമോ?
സ്റ്റേറ്റ് ബാങ്ക് ഓഫ് ഇന്ത്യയും തോമസ് കുക്ക് വെബ്സൈറ്റും ചേർന്ന് വാ​ഗ്ദാനം ചെയ്യുന്ന ഹോളിഡേ സേവിംഗ്സ് അക്കൗണ്ടിനെക്കുറിച്ച് അറിയേണ്ട കാര്യങ്ങൾ ഇതാ..

കാലാവധി

എസ്ബിഐ ഹോളിഡേ സേവിംഗ്സ് അക്കൗണ്ടിൽ 12 മാസമാണ് നിക്ഷേപം നടത്തേണ്ടത്. നിക്ഷേപ തുക ഉപഭോക്താക്കൾ തോമസ് കുക്ക് വെബ്സൈറ്റിൽ നിന്ന് തിരഞ്ഞെടുക്കുന്ന ടൂർ പാക്കേജ് അനുസരിച്ചായിരിക്കും.

പലിശ നിരക്ക്

എസ്ബിഐ റിക്കറിം​ഗ് ഡിപ്പോസിറ്റിന് ലഭിക്കുന്ന അതേ പലിശ നിരക്ക് തന്നെയാണ് 12 മാസത്തെ കാലവധിക്ക് എസ്ബിഐ ഹോളിഡേ സേവിംഗ്സ് അക്കൗണ്ടിനും ലഭിക്കുക. നിലവിലെ എസ്ബിഐയുടെ പലിശ നിരക്ക് 6.8 ശതമാനമാണ്.

നികുതി ഇളവ്

ഈ ഇ-ആർഡിക്ക് നികുത് ഇളവും ബാധകമാണ്. നികുതി ഇളവിനായുള്ള അപേക്ഷ നൽകിയാൽ കാലാവധി കഴിയുമ്പോൾ തോമസ് കുക്ക് വെബ്സൈറ്റിലേയ്ക്ക് ട്രാൻസ്ഫർ ചെയ്യുന്ന തുകയിൽ കുറവുണ്ടാകും.

പിഴ

ആർഡി ഇൻസ്റ്റാൾമെന്റ് പേയ്മെന്റിൽ കാലതാമസമുണ്ടായാൽ ഓരോ 100 രൂപയ്ക്കും 1.50 രൂപ എന്ന നിരക്കിൽ പ്രതിമാസം പിഴ ഈടാക്കുന്നതാണ്. കാലാവധി പൂർത്തിയാകുന്നതിന് മുമ്പ് തുക പിൻവലിച്ചാലും പിഴ നൽകേണ്ടി വരും.

malayalam.goodreturns.in