100 വയസ് വരെ 36,000 രൂപ പെൻഷൻ നേടാം; ദിവസ അടവ് വരുന്നത് 44 രൂപ; ഈ പദ്ധതി നിങ്ങളറിഞ്ഞോ

ജോലിയിൽ നിന്ന് വിരമിച്ച ശേഷമാണ് പെൻഷൻ പദ്ധതികളുടെ ​ഗുണം ഓരോരുത്തരും അറിയുന്നത്. ജോലിയില്ലാതെ മാസ വരുമാനം നിലയ്ക്കുന്ന സമയത്ത് സ്വനതം ചെലവുകൾ നടത്താൻ മുതിർന്ന പൗരന്മാരെ പ്രാപ്തരാക്കുന്നതാണ് പെൻഷൻ. വിവിധ പെൻഷൻ പദ്ധതികൾ ഇന്ന് വിപണിയിലുണ്ട്. സർക്കാർ ജോലിക്കാരാണെങ്കിൽ ജോലിയോടൊപ്പം പെൻഷനും ലഭിക്കും.

സാധരണ അസംഘടിത മേഖലയിലുള്ളവർക്കാണ് പെൻഷൻ പദ്ധതികൾ തിരഞ്ഞെടുക്കേണ്ടത്. നിക്ഷേപ- ഇൻഷൂറൻസ് പദ്ധതിയാണെങ്കിലും പെൻഷൻ പദ്ധതിയായി ഉപയോ​ഗിക്കാവുന്ന എൽഐസിയുടെ ജീവൻ ഉമാം​ഗിനെ പറ്റിയാണ് ചുവെട വിശദമാക്കുന്നത്. 44 രൂപയെന്ന ചെറിയ തുക ദിവസം കരുതുന്നൊരാൾക്ക് 36,000 രൂപ വാർഷിക പെൻഷൻ നൽകുന്നതാണ് പദ്ധതിയുടെ ​ഗുണം. 

പദ്ധതി വിശദാംശങ്ങൾ

90 ദിവസം പ്രായമുള്ള കുട്ടി മുതല്‍ 55 വയസ് വരെ പോളിസിയില്‍ ചേരാന്‍ സാധിക്കും. 100 വര്‍ഷത്തേക്കുള്ള കവറേജാണ് പോളിസിയുടെ ഏറ്റവും വലിയ പ്രത്യേകത. 32 വയസില്‍ പോളിസിയില്‍ ചേരുന്നൊരാള്‍ക്ക് 68 വർഷം കവറേജ് ലഭിക്കും.

ജീവൻ ഉമാം​ഗ് പോളിസിയിലെ ഏറ്റവും ചുരുങ്ങിയ അഷ്വേഡ് തുക 2 ലക്ഷം രൂപയാണ് ഉയര്‍ന്ന അഷ്വേഡ് തുകയ്ക്ക് പരിധിയില്ല. പോളിസിയില്‍ നിക്ഷേപിക്കുന്ന തുകയ്ക്ക് ആദായ നികുതി വകുപ്പ് സെക്ഷന്‍ 80 സി പ്രകാരം നികുതി ഇളവുണ്ട്. 

പോളിസി കാലയളവ്

നാല് പോളിസി പ്രീമിയം അടവ് കാലയളവുകളുണ്ട്. പോളിസി ഉടമയുടെ ആവശ്യമനുസരിച്ച് ഇവ തിരഞ്ഞടുക്കാം. ചരുങ്ങിയ പോളിസി കാലയളവ് 15 വര്‍ഷമാണ്. 20 വര്‍ഷം, 25 വര്‍ഷം, 30 വര്‍ഷം എന്നിങ്ങനെ വിവിധ കാലയളവ് പ്രീമിയം അടയ്ക്കാന്‍ സാധിക്കും.

മാസത്തിലോ ത്രൈമാസത്തിലോ അര്‍ധ വര്‍ഷത്തിലോ പോളിസിയില്‍ പ്രീമിയം അടയ്ക്കാം. പോളിസി കാലയളവിന് ശേഷം വർഷത്തിൽ തവണകളായി തുക ലഭിക്കും. കുട്ടികളുടെ പേരിലാണ് പോളിസിയില്‍ ചേരുന്നതെങ്കില്‍ വരുമാനം ലഭിക്കാന്‍ 30 വയസ് പൂര്‍ത്തിയാകണം. 

മരണാനുകൂല്യം

പോളിസിയുടെ പ്രീമിയം അടവ് കാലയളവില്‍ പോളിസി ഉടമ മരണപ്പെട്ടാല്‍ ഡെത്ത് ബെനഫിറ്റ് ലഭിക്കും. ഇത് വാര്‍ഷിക പ്രീമിയത്തിന്റെ പത്തിരട്ടിയായിരിക്കും. പോളിസി ഉടമ പ്രീമിയം കാലയളവ് എല്ലാ മാസ തവണകളും അടച്ച് പൂര്‍ത്തിയാക്കിയാല്‍ സം അഷ്വേഡ് തുകയുടെ 8 ശതമാനം സര്‍വൈവല്‍ ബെനഫിറ്റായി എല്ലാ വര്‍ഷവും പോളിസി ഉടമയ്ക്ക് ലഭിക്കും.

പോളിസി പ്രീമിയം കാലായളവ് കഴിഞ്ഞാലുടന്‍ ഈ തുക ലഭിക്കാന്‍ തുടങ്ങും. പോളിസി ഉടമ 100 വയസിനിടെ മരണപ്പെട്ടാല്‍ നോമിനിക്ക് തുക ലഭിക്കും. ഇത് തവണകളായോ ഒറ്റതവണയായോ പിന്‍വലിക്കാന്‍ സാധിക്കും. പോളിസി മുന്നോട്ട് കൊണ്ടു പോകാൻ താൽപര്യമില്ലെങ്കിൽ 3 വർഷത്തിന് ശേഷം സറണ്ടർ ചെയ്യാം.

പോളിസി കാൽക്കുലേറ്റർ

44 രൂപ അടച്ചാൽ 36000 രൂപയുടെ വരുമാനം തന്നെയാണ് ജീവൻ ഉമാം​ഗ് പോളിസിയുടെ പ്രത്യേകത. ഇതിന്റെ കണക്ക് കൂട്ടലുകൾ നോക്കാം. 26ാം വയസില്‍ എല്‍ഐസി ജീവന്‍ ഉമാംഗ് പോളിസിയില്‍ 4.5 ലക്ഷം അഷ്വേഡ് തുകയുള്ള ഇൻഷൂറൻസ് വാങ്ങുന്നൊരാളുടെ മാസ അടവ് 1,305 രൂപയാണ്. ഇതിനായി ദിവസത്തിൽ ആവശ്യമായി വരുന്നത് 44 രൂപയും. വാർഷിക പ്രീമിയമാണെങ്കിൽ 15,882 രൂപ വരും.

30 വര്‍ഷത്തെ പോളിസി പ്രീമിയം കാലയളവിൽ 4,76,460 രൂപ പ്രീമിയമായി അടയ്ക്കേണ്ടി വരും. 30 വര്‍ഷത്തേക്ക് മുടക്കമില്ലാതെ പോളിസി പ്രീമിയം അടച്ചൊരാൾക്ക് കാലാവധിക്ക് ശേഷം വർഷത്തിൽ 36,000 രൂപ വര്‍ഷത്തില്‍ എല്‍ഐസിയില്‍ നിന്ന് ലഭിക്കും. സം അഷ്വേഡിന്റെ 8 ശതമാനമാണിത്. 100 വയസ് വരെ വര്‍ഷത്തില്‍ ഈ തുക ലഭിക്കും.