5 വർഷത്തിനുള്ളിൽ ഒരു ലക്ഷം രൂപയ്ക്ക് 39,625 രൂപ പലിശ, സർക്കാരിന്റെ പുതിയ ടൈം ഡിപ്പോസിറ്റ് പദ്ധതി

നാഷണൽ സേവിംഗ്സ് ടൈം ഡെപ്പോസിറ്റ് സ്കീം 2019ന്റെ പുതിയ പലിശ നിരക്കും നിക്ഷേപ കാലയളവും ധനമന്ത്രാലയം അറിയിച്ചു. ഈ പദ്ധതി നാല് തരം ടൈം ഡെപ്പോസിറ്റാണ് വാഗ്ദാനം ചെയ്യുന്നത്. ഒരു വർഷത്തെ അക്കൗണ്ട്, രണ്ട് വർഷത്തെ അക്കൗണ്ട്, മൂന്ന് വർഷത്തെ അക്കൗണ്ട്, അഞ്ച് വർഷത്തെ അക്കൗണ്ട്. ഈ അക്കൗണ്ടുകളിൽ ഒരാൾക്കോ സംയുക്തമായി മൂന്ന് പേർക്കോ 10 വയസ്സിന് താഴെയുള്ള പ്രായപൂർത്തിയാകാത്തവർക്ക് വേണ്ടി രക്ഷകർത്താവിനോ നിക്ഷേപം നടത്താവുന്നതാണ്. ഒരു വ്യക്തിക്ക് ഒന്നിൽ കൂടുതൽ ടിഡി അക്കൗണ്ട് ഒറ്റയ്ക്കോ സംയുക്തമായോ ആരംഭിക്കാവുന്നതാണ്.

നിക്ഷേപ തുക

ഒരു ടിഡി അക്കൗണ്ടിൽ നിക്ഷേപിക്കേണ്ട ഏറ്റവും കുറഞ്ഞ തുക 1000 രൂപയാണ്. പരമാവധി നിക്ഷേപ പരിധിയില്ല. 100 രൂപയുടെ ഗുണിതങ്ങളിലുള്ള ഏത് തുകയും ടിഡി അക്കൗണ്ടിൽ നിക്ഷേപിക്കാം.

പലിശ നിരക്ക്

ടൈം ഡെപ്പോസിറ്റ് അക്കൌണ്ടുകളുടെ നാല് വിഭാഗങ്ങളിൽ നിലവിലുള്ള പലിശ നിരക്കുകൾ ചുവടെ ചേർക്കുന്നു

• 1 വർഷം - 6.9%
• 2 വർഷം - 6.9%
• 3 വർഷം - 6.9%
• 5 വർഷം - 7.7%

പ്രധാന നിബന്ധനകൾ‌

ഈ നാല് അക്കൌണ്ടുകളിലെയും നിക്ഷേപത്തിന് നൽകുന്ന പലിശനിരക്ക് ത്രൈമാസമായി കൂട്ടിച്ചേർക്കുകയും അക്കൗണ്ട് തുറക്കുന്ന തീയതി മുതൽ വർഷാവസാനം നൽകുകയും ചെയ്യും. അക്കൌണ്ട് ഉടമയ്ക്ക് സേവിംഗ്സ് ബാങ്ക് അക്കൌണ്ടിലേക്ക് പലിശ വരുമാനം ക്രെഡിറ്റ് ചെയ്യാനും സാധിക്കും. നിക്ഷേപകൻ തന്റെ നിക്ഷേപത്തിൽ നിന്ന് നേടിയ വാർഷിക പലിശ പിൻവലിക്കുന്നില്ലെങ്കിലും പദ്ധതി അനുസരിച്ച് അധിക പലിശ ലഭിക്കില്ല.

ഒരു ലക്ഷം രൂപയ്ക്ക് ഒരു വർഷത്തെ പലിശ

മുകളിൽ സൂചിപ്പിച്ച വ്യവസ്ഥകൾ അനുസരിച്ച്, യഥാക്രമം 1, 2, 3, 5 വർഷത്തെ സ്കീമുകളിൽ ഒരു ലക്ഷം രൂപ നിക്ഷേപിക്കുമ്പോൾ ലഭിക്കുന്ന വാർഷിക പലിശ (നിലവിലെ പലിശനിരക്ക് അനുസരിച്ച്) താഴെ പറയുന്ന രീതിയിലാണ്.

• 1 വർഷം (6.9%) - 7081 രൂപ
• 2 വർഷം (6.9%) - 7081 രൂപ
• 3 വർഷം (6.9%) - 7081 രൂപ
• 5 വർഷം (7.7%) - 7925 രൂപ

മേൽപ്പറഞ്ഞ ചാർട്ട് അനുസരിച്ച് 5 വർഷത്തെ അക്കൗണ്ടിൽ ഒരു ലക്ഷം രൂപ നിക്ഷേപിക്കുകയാണെങ്കിൽ അഞ്ച് വർഷത്തിനുള്ളിൽ മൊത്തം 7925 × 5 = 39,625 രൂപ പലിശയായി നേടാം. നിങ്ങൾക്ക് ഓരോ വർഷവും നേടുന്ന പലിശ പിൻവലിക്കാനും മറ്റ് സ്കീമുകളിൽ വീണ്ടും നിക്ഷേപിക്കാനും കഴിയും.

പിൻവലിക്കൽ

5 വർഷത്തെ ടൈം ഡെപ്പോസിറ്റ് അക്കൗണ്ട് നിക്ഷേപ തീയതി മുതൽ നാല് വർഷത്തിന് ശേഷം ക്ലോസ് ചെയ്താൽ മൂന്ന് വർഷത്തെ ടൈം ഡെപ്പോസിറ്റ് അക്കൗണ്ടിനായി അനുവദനീയമായ നിരക്ക് ബാധകമാകും. ഇതിനകം നൽകിയ പലിശ നിക്ഷേപ തുകയിൽ നിന്നും ഈടാക്കും.