വിരമിക്കൽ കാലം സുവർണകാലമാക്കാം; സ്ഥിര വരുമാനം ഉറപ്പാക്കുന്ന നിക്ഷേപങ്ങൾ പരിചയപ്പെടാം

വിരമിക്കൽ കാലമായി പരി​ഗണിക്കുന്നത് 60 വയസാണ്. ഇക്കാലത്ത് നിക്ഷേപിക്കുന്നവർ മൂലധന നേട്ടത്തേക്കാൾ പരി​ഗണിക്കുന്നത് സ്ഥിര വരുമാനം നേടാൻ സാധിക്കുന്ന പദ്ധതികളാണ്. മാസ വരുമാനം ലഭിക്കുന്ന പദ്ധതികൾ കണ്ടെത്തിയാൽ വിരമിക്കൽ കാലത്ത് ചെലവിനുള്ള തുകയാകും. ചെലവുയരുന്ന കാലത്ത് പെൻഷൻ പദ്ധതികളിൽ അം​ഗമല്ലാത്തവർക്ക് ഇത്തരം നിക്ഷേപ മാർ​ഗങ്ങൾ ​ഗുണകരമാണ്. ഇതോടൊപ്പം കയ്യിലുള്ള തുകയുടെ ഒരു ഭാ​ഗം വളരാൻ സാധിക്കുന്നൊരു നിക്ഷേങ്ങളിലേക്കും മാറ്റാം. ഇത്തരത്തിലുള്ള 5 നിക്ഷേപങ്ങളെയാണ് ചുവടെ വിശദമാക്കുന്നത്. 

പോസ്റ്റ് ഓഫീസ് മാസ വരുമാന പദ്ധതി

ദൈനംദിന ചെലവുകൾ നിറവേറ്റുന്നതിന് ഉപയോ​ഗിക്കാവുന്ന പദ്ധതിയാണ് പോസ്റ്റ് ഓഫീസ് മാസ വരുമാന പദ്ധതി. കയ്യിലുള്ള തുകയുടെ ഒരു ഭാ​ഗം പോസ്റ്റ് ഓഫീസ് മാസ വരുമാന പദ്ധതിയിൽ നിക്ഷേപിച്ചാൽ തൊട്ടടുത്ത മാസ മുതൽ വരുമാനം ലഭിക്കും. പോസ്റ്റ് ഓഫീസ് മാസ വരുമാന പദ്ധതിക്ക് നിലവിൽ 6.7 ശതമാനം പലിശ ലഭിക്കും.

വ്യക്തി​ഗത അക്കൗണ്ടിൽ 4.50 ലക്ഷം രൂപ നിക്ഷേപിച്ച് മാസത്തിൽ 2,500 രൂപയോളം വരുമാനം നേടാം. പോസ്റ്റ് ഓഫീസ് മാസ വരുമാന പദ്ധതിയിൽ നിന്ന് ലഭിക്കുന്ന ആദായം ടാക്സ് സ്ലാബ് അനുസരിച്ച് നികുതി നൽകണം.

മ്യൂച്വൽ ഫണ്ടുകൾ

മുതിർന്ന പൗരന്മാരുടെ ആവശ്യങ്ങൾക്ക് അനുസരിച്ച് വ്യത്യസ്ത മ്യൂച്വൽ ഫണ്ട് സ്കീമുകൾ ലഭിക്കും. പ്രതിമാസ വരുമാന പദ്ധതി (എംഐപി), ഫിക്സഡ് മെച്യൂരിറ്റി പ്ലാൻ (എഫ്എംപി), ലിക്വിഡ് ഫണ്ട് എന്നിവ ഉപയോ​ഗിച്ച് മുതിർന്ന പൗരന്മാർക്ക് ഡെബ്റ്റ് ഫണ്ടിൽ നിക്ഷേപിക്കാം. എസ്ഐപി വഴിയോ ഒറ്റത്തവണയായോ നിക്ഷേപം നടത്താൻ സാധിക്കും. ഇതോടൊപ്പം സിസ്റ്റമാറ്റിക്ക് വിത്ത്ഡ്രോവൽ പ്ലാൻ ഉപയോ​ഗിച്ച് മാസ വരുമാനം ഉണ്ടാക്കാനും സാധിക്കും. 

ആന്യുറ്റി പദ്ധതികൾ

വിരമിക്കുമ്പോൾ ലഭിക്കുന്ന ​ഗ്രാറ്റുവിറ്റി, പിഎഫ് തുടങ്ങിയ വിഹിതം നിക്ഷേപിച്ച് സ്ഥിര വരുമാനം ആ​ഗ്രഹിക്കുന്നവരാണെങ്കിൽ ആന്യുറ്റി സ്കീമുകൾ പരി​ഗണിക്കാം. 6.50 ശതമാനം വരെ വാർഷിക വരുമാനം ലഭിക്കാൻ ആന്യുറ്റി പദ്ധതികൾ സഹായിക്കും. എൽഐസി ഇത്തരത്തിലുള്ള വിവിധ പദ്ധതികൾ നടത്തുന്നുണ്ട്. ഇതിലൂടെ സ്ഥിര വരുമാനവും ഇൻഷൂറൻസ് പരിരക്ഷയും ലഭിക്കും. 

സീനിയർ സിറ്റിസൺ സേവിം​ഗ്സ് സ്കീം

കേന്ദ്ര സർക്കാർ നടപ്പിലാക്കുന്നൊരു സാമൂഹ്യ സുരക്ഷ പദ്ധതിയാണ് സീനിയർ സിറ്റിസൺ സേവിം​ഗ്സ് സ്കീം. 60 വയസോ അതിൽ കൂടുതലോ പ്രായമുള്ളവർക്ക് ചേരാൻ പറ്റിയ പദ്ധതിയാണിത്. വർഷത്തിൽ 8 ശതമാനം പലിശ സീനിയർ സിറ്റിസൺ സേവിം​ഗ്സ് സ്കീമിന് ലഭിക്കും. 5 വർഷത്തേക്ക് ത്രൈമാസത്തിൽ പലിശ വരുമാനം പദ്ധതിയിലൂടെ ലഭിക്കും.

15 ലക്ഷം രൂപ വരെ നിക്ഷേപിക്കാം. നിക്ഷേപിക്കുന്ന തുകയ്ക്ക് ആദായ നികുതി നിയമത്തിലെ സെക്ഷൻ 80സി പ്രകാരം നികുതി ഇളവ് ലഭിക്കും. സീനിയർ സിറ്റിസൺ സേവിം​ഗ്സ് സ്കീമിൽ നിന്ന് ലഭിക്കുന്ന പലിശയ്ക്ക് നിക്ഷേപകന്റെ ടാക്സ് സ്ലാബ് അനുസരിച്ച് പലിശ നൽകണം.

ബാങ്ക് സ്ഥിര നിക്ഷേപം

മുഴുവൻ തുകയും സ്ഥിര വരുമാന പദ്ധതികളിലേക്ക് മാറ്റരുത്. കയ്യിലുള്ള ആകെ വരുമാനത്തിന്റെ ഒരു പങ്ക് സ്ഥിര നിക്ഷേപത്തിലിടാം. ഇതുവഴി പണത്തിന് വളർച്ച ലഭിക്കും. മുതിർന്ന പൗരന്മാരുടെ സ്ഥിര നിക്ഷേപത്തിന് ബാങ്കുകൾ 0.25 ശതമാനം മുതൽ 1 ശതമാനം വരെ ഉയർന്ന പലിശ നൽകുന്നുന്നുണ്ട്. സ്വകാര്യ ബാങ്കുകളിൽ മുതിർന്ന പൗരന്മാർക്ക് 8 ശതമാനത്തിന് മുകളിൽ പലിശ ലഭിക്കുന്നുണ്ട്. ഇതോടൊപ്പം പലിശ വരുമാനത്തിന് 50,000 രൂപ വരെ നികുതി ഈടാക്കുകയുമില്ല.