പിപിഎഫിൽ നിക്ഷേപിക്കുമ്പോൾ ഈ ട്രിക്ക് ഉപയോഗിക്കൂ, നിങ്ങൾക്കും കോടീശ്വരനാകാം

ജീവിതച്ചെലവ് വർദ്ധിക്കുകയും പണപ്പെരുപ്പ നിരക്ക് വർദ്ധിക്കുകയും ചെയ്യുന്നതിനാൽ, ഇപ്പോൾ ആളുകൾ വിരമിക്കുന്നതിന് മുമ്പ് തങ്ങളുടെ അക്കൗണ്ടിൽ കുറഞ്ഞത് ഒരു കോടി രൂപയോ അതിൽ കൂടുതലോ ഉണ്ടായിരിക്കണമെന്നാണ് ആഗ്രഹിക്കുന്നത്. എന്നാൽ, അടുത്തിടെയായി കൊറോണ വൈറസ് പ്രതിസന്ധി കാരണം പിപിഎഫ് പോലുള്ള സർക്കാർ പിന്തുണയുള്ള ചെറുകിട സമ്പാദ്യ പദ്ധതികളിൽ ആളുകൾ വീണ്ടും താൽപര്യം പ്രകടിപ്പിച്ചു കഴിഞ്ഞു.

ജനപ്രിയ നിക്ഷേപം

പബ്ലിക് പ്രൊവിഡന്റ് ഫണ്ട് (പി‌പി‌എഫ്) വിരമിക്കൽ സമ്പാദ്യം, നിക്ഷേപം എന്നിവയ്ക്കായി മിക്ക ആളുകളും തിരഞ്ഞെടുക്കുന്ന ഏറ്റവും ജനപ്രിയ ദീർഘകാല നിക്ഷേപ മാർഗമാണ്. ആകർഷകമായ 7.1 ശതമാനം പലിശനിരക്കും നികുതിയിൽ നിന്ന് പൂർണമായും ഒഴിവാക്കിയ റിട്ടേണുകളും ഉപയോഗിച്ച് ഗവൺമെന്റിന്റെ പിന്തുണയുള്ള പദ്ധതി സുരക്ഷ വാഗ്ദാനം ചെയ്യുന്നു. വാസ്തവത്തിൽ, പിപിഎഫ് ഇഇഇ നികുതി ആനുകൂല്യങ്ങൾ വാഗ്ദാനം ചെയ്യുന്നു. അതായത് സംഭാവന, പലിശ, കാലാവധി പൂർത്തിയാകുന്ന വരുമാനം എന്നിവയെല്ലാം നികുതി രഹിതമാണ്.

ആനുകൂല്യങ്ങൾ

പിപിഎഫ് അക്കൗണ്ട് ഒരു സാമ്പത്തിക വർഷത്തിൽ നിക്ഷേപകന് 1.5 ലക്ഷം രൂപ വരെ ഇഇഇ ആനുകൂല്യം നൽകുന്നു. പി‌പി‌എഫ് അക്കൌണ്ടിൽ 1.5 ലക്ഷം രൂപ മുതൽ മുടക്കിൽ ഒരാൾക്ക് ആദായനികുതി ഇളവ് ലഭിക്കും. പഴയ ആദായനികുതി സ്ലാബ് തിരഞ്ഞെടുത്ത് ആദായനികുതി റിട്ടേൺ (ഐടിആർ) ഫയൽ ചെയ്യുന്ന വ്യക്തികൾക്ക് മാത്രമേ ഇഇഇ ആനുകൂല്യം ലഭ്യമാകൂ. പിപിഎഫിന് 15 വർഷത്തെ കാലാവധിയാണുള്ളത്. എന്നിരുന്നാലും, പി‌പി‌എഫ് അക്കൌണ്ട് 5 വർഷത്തേക്ക് കൂടി നീട്ടാൻ കഴിയും.

പിപിഎഫ് കോടിപതി

15 വർഷത്തെ മുഴുവൻ മെച്യൂരിറ്റി കാലയളവിലും 7.1 ശതമാനം ശരാശരി വരുമാനം കണക്കാക്കിയാൽ ഒരാൾ ഒരു സാമ്പത്തിക വർഷത്തിൽ 1.5 ലക്ഷം രൂപ (പ്രതിമാസം 12,500 രൂപ) പിപിഎഫ് അക്കൗണ്ടിൽ നിക്ഷേപിക്കുകയാണെങ്കിൽ, പിപിഎഫ് കാൽക്കുലേറ്റർ അനുസരിച്ച്, 15 വർഷത്തിനുശേഷമുള്ള മെച്യൂരിറ്റി തുക 40,68,210 രൂപ. നിക്ഷേപ കാലയളവിൽ ഒരാൾക്ക് ഓരോ സാമ്പത്തിക വർഷവും 1.5 ലക്ഷം രൂപ വരെ നിക്ഷേപത്തിന് ആദായനികുതി ഇളവ് ലഭിക്കും. ഈ കാലയളവിൽ മെച്യൂരിറ്റി തുകയും പലിശയും 100 ശതമാനം ആദായനികുതിയിൽ നിന്ന് ഒഴിവാക്കപ്പെടും.

15 വർഷം മാത്രം പോരാ

പിപിഎഫിൽ നിക്ഷേപിച്ച് ഒരു കോടിപതിയാകാൻ 15 വർഷം മാത്രം പോരാ. പക്ഷേ, പി‌പി‌എഫ് വിപുലീകരണ സൗകര്യം വാഗ്ദാനം ചെയ്യുന്നതിനാൽ, നിങ്ങളുടെ അക്കൗണ്ട് കൂടുതൽ വിപുലീകരിക്കാനും ഒരു കോടി രൂപയിലെത്താൻ തുടർന്നും സംഭാവന നൽകാനും കഴിയും. മെച്യൂരിറ്റി കാലയളവിലെ ഒരു വർഷത്തിനുള്ളിൽ ഫോം-എച്ച് സമർപ്പിച്ചുകൊണ്ട് ഒരാൾക്ക് മെച്യൂരിറ്റി കാലയളവിൽ 15 വർഷത്തിനപ്പുറം പിപിഎഫ് അക്കൗണ്ട് നീട്ടാൻ കഴിയും. ഇത് ചെയ്യുന്നതിലൂടെ, ഇഇഇ ആനുകൂല്യങ്ങൾ നേടുന്നത് തുടരാം.

ഫോം-എച്ച്

പി‌പി‌എഫ് അക്കൌണ്ട് വിപുലീകരണത്തിന് പരിധിയില്ല. എന്നിരുന്നാലും, ഓരോ തവണയും അക്കൌണ്ട് ഉടമ ഒരു സമയം 5 വർഷം നീട്ടുന്നതിന് ഫോം-എച്ച് സമർപ്പിക്കേണ്ടതുണ്ട്. അതിനാൽ, ഒരു പി‌പി‌എഫ് അക്കൌണ്ട് ഉടമ 25 വർഷത്തേക്ക് നിക്ഷേപിക്കാൻ ആഗ്രഹിക്കുന്നുവെങ്കിൽ, നിക്ഷേപകൻ 15, 20 വർഷങ്ങൾക്ക് ശേഷം രണ്ടുതവണ ഫോം-എച്ച് സമർപ്പിക്കേണ്ടതാണ്. ഒരു നിക്ഷേപകൻ 25 വർഷത്തേക്ക് ഓരോ വർഷവും 1.5 ലക്ഷം രൂപ നിക്ഷേപിക്കുന്നുണ്ടെങ്കിൽ, പലിശ നിരക്ക് 7.1 ശതമാനമാണെങ്കിൽ മെച്യൂരിറ്റി തുക 1,02,40,260 രൂപയായിരിക്കും.