എസ്ബിഐ റിക്കറിം​ഗ് ഡിപ്പോസിറ്റ്: നേട്ടമുണ്ടാക്കേണ്ടത് എങ്ങനെ? അറിയേണ്ട കാര്യങ്ങൾ

ശമ്പളക്കാരുടെയും ഇടത്തരം വരുമാനക്കാരുടെയും മികച്ച നിക്ഷേപ മാർ​ഗങ്ങളിൽ ഒന്നാണ് റിക്കറിം​ഗ് നിക്ഷേപം അഥവാ ആർ.ഡി. ഓരോ മാസവും ഒരു നിശ്ചിത തുകയാണ് ആർഡിയിലേയ്ക്ക് നിക്ഷേപിക്കേണ്ടത്. സ്റ്റേറ്റ് ബാങ്ക് ഓഫ് ഇന്ത്യയിലെ റിക്കറിം​ഗ് ഡിപ്പോസിറ്റിനെക്കുറിച്ച് അറിയേണ്ട പ്രധാനപ്പെട്ട കാര്യങ്ങൾ.

നോമിനേഷൻ ചെയ്യാം

എസ്ബിഐയിൽ റിക്കറിം​ഗ് ഡിപ്പോസിറ്റ് തുടങ്ങുന്നവർക്ക് അക്കൗണ്ടിന് നോമിനിയെ വയ്ക്കാവുന്നതാണ്. ഏതെങ്കിലും കാരണവശാൽ പണം പിൻവലിക്കാൻ അക്കൗണ്ട് ഉടമയ്ക്ക് സാധിച്ചില്ലെങ്കിൽ പിന്നീട് നോമിനിയ്ക്കാണ് അക്കൗണ്ടിന്റെ പൂർണാവകാശം.

റിക്കറിം​ഗ് ഡിപ്പോസിറ്റിൽ നിന്ന് വായ്പ

ഉപഭോക്താക്കൾക്ക് റിക്കറിം​ഗ് ഡിപ്പോസിറ്റിൽ നിന്ന് വായ്പയും എടുക്കാവുന്നതാണ്. റിക്കറിം​ഗ് നിക്ഷേപത്തിന്റെ 90 ശതമാനം വരെ വായ്പയായി എടുക്കാം.

നിക്ഷേപ തുക

റിക്കറിം​ഗ് ഡിപ്പോസിറ്റിൽ മിനിമം 100 രൂപ വീതമാണ് നിക്ഷേപം നടത്തേണ്ടത്. പരമാവധി തുകയ്ക്ക് ബാങ്ക് പരിധി നിശ്ചയിച്ചിട്ടില്ല.

കാലാവധി

എസ്ബിഐ റിക്കറിം​ഗ് ഡിപ്പോസിറ്റിന്റെ മിനിമം കാലാവധി 12 മാസമാണ്. പരമാവധി കാലാവധി 120 മാസവും.

പലിശ നിരക്ക്

എസ്ബിഐയുടെ റിക്കറിം​ഗ് ഡിപ്പോസിറ്റ് അല്ലെങ്കിൽ ആർഡി പലിശ നിരക്ക് സ്ഥിര നിക്ഷേപ പലിശ നിരക്കിന് തുല്യമാണ്. 6.85 ശതമാനമാണ് സാധാരണ പൗരന്മാർക്ക് എസ്ബിഐ വാ​ഗ്ദാനം ചെയ്യുന്ന കൂടിയ പലിശ നിരക്ക്. മുതിർന്ന പൗരന്മാർക്ക് പരമാവധി 7.35 ശതമാനം വരെ പലിശ ലഭിക്കും.

നിക്ഷേപം മുടക്കിയാൽ പിഴ

റിക്കറിം​ഗ് ഡിപ്പോസിറ്റ് നിക്ഷേപം മുടക്കിയാൽ ബാങ്ക് പിഴ ഈടാക്കുന്നതാണ്. 5 വർഷ കാലാവധിയിൽ കുറവുള്ള നിക്ഷേപങ്ങൾക്ക് നൂറു രൂപയ്ക്ക് 1.5 രൂപ എന്ന നിരക്കിലാണ് ബാങ്ക് പിഴ ഈടാക്കുന്നത്. കാലാവധി 5 വർഷത്തിന് മുകളിലാണെങ്കിൽ പിഴ 100 രൂപയ്ക്ക് 2 രൂപ എന്ന നിലയ്ക്കാണ്.

malayalam.goodreturns.in