വിദേശത്ത് നിന്ന് മടങ്ങിയെത്തുന്നവർക്ക് സർക്കാരിന്റെ വായ്പ, 3 ലക്ഷം രൂപ വരെ സബ്സിഡി

പ്രവാസികൾക്ക് സന്തോഷ വാർത്ത. വിദേശത്ത് നിന്ന് തിരികെയെത്തുന്ന പ്രവാസികൾക്ക് നോർക്ക റൂട്ട്സിന്റെ പ്രത്യേക പുനരധിവാസ പദ്ധതി. നോർക്ക ഡിപ്പാർട്ട്മെന്റ് പ്രൊജക്ട് ഫോർ റിട്ടേൺ എമിഗ്രൻസ് എന്ന പദ്ധതിയാണ് ഗൾഫിൽ നിന്ന് നാട്ടിലേയ്ക്ക് മടങ്ങിയെത്തുന്നവർക്കായി ഒരുക്കിയിരിക്കുന്നത്.

ആർക്കൊക്കെ ലഭിക്കും?

രണ്ടു വർഷമെങ്കിലും വിദേശത്ത് ജോലി ചെയ്ത ശേഷം നാട്ടിലേയ്ക്ക് സ്ഥിരമായി മടങ്ങുന്നവർക്കും ഈ പദ്ധതിയിലൂടെ വായ്പ ലഭിക്കും. കോഴി വളർത്തൽ, മത്സ്യകൃഷി, ക്ഷീരോത്പാദനം, ഭക്ഷ്യസംസ്കരണം, ഫാം ടൂറിസം, ആടു വളർത്തൽ, പച്ചക്കറി കൃഷി, പുഷ്പക്കൃഷി, തേനീച്ച വളർത്തൽ, റിപ്പയർ ഷോപ്പ്, റസ്റ്റോറന്റുകൾ, ഹോം സ്റ്റേ, ടാക്സി, പൊടിമില്ലുകൾ, ബേക്കറി ഉത്പന്നങ്ങൾ, ഫർണിച്ചർ, സലൂണുകൾ, പേപ്പർ കപ്പ്, പേപ്പർ റിസൈക്ലിംഗ്, തുടങ്ങിയ ബിസിനസുകൾക്ക് വായ്പ ലഭിക്കും.

പലിശയിളവും സബ്സിഡിയും

പരമാവധി 30 ലക്ഷം രൂപ വരെ ചെലവ് വരുന്ന ബിസിനസികൾക്ക് വായ്പ ലഭിക്കും. വായ്പയുടെ 15%, അതായത് പരമാവധി 3 ലക്ഷം രൂപ വരെ സബ്സിഡി ലഭിക്കും. വായ്പ കൃത്യമായി തിരിച്ചടയ്ക്കുന്നവർക്ക് 4 വർഷത്തേയ്ക്ക് 3% പലിശയിളവും ലഭ്യമാണ്.

വായ്പ എവിടെ നിന്ന് ലഭിക്കും?

നോർക്ക റൂട്ട്സ്സുമായി ചേർന്ന് താഴെ പറയുന്ന ബാങ്കുകളിൽ നിന്നും സ്ഥാപനങ്ങളിൽ നിന്നും മടങ്ങിയെത്തിയ പ്രവാസികൾക്ക് വായ്പ ലഭിക്കും.  

• സ്റ്റേറ്റ് ബാങ്ക് ഓഫ് ഇന്ത്യ
• ഫെഡറൽ ബാങ്ക്
• സൗത്ത് ഇന്ത്യൻ ബാങ്ക്
• യൂണിയൻ ബാങ്ക് ഓഫ് ഇന്ത്യ
• ബാങ്ക് ഓഫ് ബറോഡ
• സിൻഡിക്കേറ്റ് ബാങ്ക്
• ഇന്ത്യൻ ഓവർസീസ് ബാങ്ക്
• ബാങ്ക് ഓഫ് ഇന്ത്യ
• യൂക്കോ ബാങ്ക്
• കേരള ഫിനാൻഷ്യൽ കോർപ്പറേഷൻ
• പട്ടികജാതി പട്ടികവർഗ വികസന കോർപ്പറേഷൻ

ആവശ്യമായ രേഖകൾ

• 2 വർഷം വിദേശവാസം തെളിയിക്കുന്ന പാസ്പോർട്ട്
• റേഷൻ കാർഡ്
• ആധാർ
• പാൻ
• 3 പാസ്പോർട്ട് സൈസ് ഫോട്ടോ
• ആരംഭിക്കുന്ന ബിസിനസിനെക്കുറിച്ചുള്ള വിവരണം

രജിസ്റ്റർ ചെയ്യേണ്ടത് എങ്ങനെ?

• https://www.norkaroots.org/ndprem എന്ന വെബ്സൈറ്റ് വഴി സ്വന്തമായോ അക്ഷയകേന്ദ്രങ്ങൾ വഴിയോ രജിസ്റ്റർ ചെയ്യാം.
• കൂടുതൽ വിവരങ്ങൾക്ക് ബന്ധപ്പെടാനുള്ള നമ്പർ:1800 425 3939/ 0471- 2770500