മുംബൈ: റിട്ടയര്‍മെന്റിനു ശേഷമുള്ള സാമ്പത്തിക സുരക്ഷയ്ക്ക് പ്രാധാന്യമേറി വരുമ്പോള്‍ ഇന്ത്യയില്‍ നിന്നും അത്ര നല്ല വാര്‍ത്തയല്ല. ഇന്ത്യയിലെ 47 ശതമാനം ജോലിക്കാരും വിരമിച്ചതിനുശേഷമുള്ള ജീവിതത്തിനായി ഒന്നും കരുതിവെയ്ക്കുന്നില്ലെന്ന് റിപ്പോര്‍ട്ട്.

ലണ്ടന്‍ ആസ്ഥാനമായ മാര്‍ക്കറ്റ് റിസര്‍ച്ച് സ്ഥാപനമായ ഇപ്‌സോസ് മോറി ഓണ്‍ലൈനില്‍ നടത്തിയ സര്‍വേയില്‍ ഇന്ത്യയിലെ 47 ശതമാനം ജോലിക്കാരും വിരമിച്ചതിനുശേഷമുള്ള ജീവിതത്തിനായി സമ്പാദിക്കാത്തവരോ സമ്പാദിക്കുന്നത് നിര്‍ത്തിവെച്ചവരോ ആണെന്നു കണ്ടെത്തി.

2015 സെപ്റ്റംബറിലും ഒക്ടോബറിലുമായാണ് സര്‍വേ നടത്തിയത്. അര്‍ജന്റീന, ആസ്‌ട്രേലിയ, ബ്രസീല്‍, കാനഡ, ചൈന, ഈജിപ്ത്, ഫ്രാന്‍സ്, ഹോങ്കോങ്, ഇന്ത്യ, ഇന്തോനേഷ്യ, മലേഷ്യ, മെക്‌സികോ, സിംഗപ്പൂര്‍, തായ് വാന്‍, യു.എ.ഇ, യു.കെ, യു.എസ് എന്നീ രാജ്യങ്ങളിലെ 18,207 പേര്‍ക്കിടയിലാണ് സര്‍വേ നടത്തിയത്.

ഇന്ത്യയില്‍ പെന്‍ഷന്‍കാലത്തെ ജീവിതത്തിനുവേണ്ടി സമ്പാദിക്കാന്‍ തുടങ്ങിയ 44 ശതമാനം പേര്‍ക്ക് ഇടയില്‍ ബുദ്ധിമുട്ടുകള്‍ നേരിടേണ്ടിവന്നു. 21 ശതമാനം ഇതുവരെ സമ്പാദിക്കാന്‍ തുടങ്ങിയിട്ടേയില്ല. 60 വയസ്സിനുമുകളിലുള്ള 22 ശതമാനം ജോലിക്കാരും 50 വയസ്സിന് മുകളിലുള്ള 14 ശതമാനം പേരും വിരമിച്ചതിനുശേഷമുള്ള ജീവിതത്തിനായി സമ്പാദ്യമാരംഭിച്ചിട്ടില്ല. പത്തിലൊരാള്‍ റിട്ടയര്‍മെന്റ് സംബന്ധിച്ച ഉപദേശങ്ങളോ വിവരങ്ങളോ സ്വീകരിച്ചിട്ടില്ല.