ഡാക്ക് പേ ആപ്പ്; ഡിജിറ്റൽ പെയ്മെന്റ് സേവനത്തിനായി ആപ്പ് പുറത്തിറക്കി തപാൽ വകുപ്പ്

ദില്ലി; തപാൽ വകുപ്പും ഇന്ത്യ പോസ്റ്റ് പെയ്മെന്റ് ബാങ്കും(IPPB) ചേർന്ന് ഒരു പുതിയ ഡിജിറ്റൽ പെയ്മെന്റ് ആപ്പ് 'ഡാക്ക് പേ' പുറത്തിറക്കി. രാജ്യമെമ്പാടും എല്ലാവരെയും ഡിജിറ്റൽ പണമിടപാടിലേക്ക് ഉൾച്ചേർക്കുക എന്ന ലക്ഷ്യത്തോടെയാണ് നടപടി.
ഡാക്ക് പേ വെറുമൊരു ഡിജിറ്റൽ ആപ്പ് മാത്രമല്ല, മറിച്ച് തപാൽ മാർഗ്ഗത്തിലൂടെ ബാങ്കിംഗ് സേവനങ്ങൾ ഉറപ്പാക്കുകയും ചെയ്യുന്നു.

ആഭ്യന്തര പണം കൈമാറ്റം(domestic money transfer), ക്യു ആർ കോഡ് സ്കാൻ ചെയ്ത് സേവനങ്ങൾക്കും സാധനങ്ങൾക്കും ഉള്ള തുക ഡിജിറ്റൽ ആയി നൽകൽ (Virtual debit card & with UPI), ബയോമെട്രിക്കിലൂടെ നോട്ട് രഹിത ഇടപാടുകൾ, ഏതു ബാങ്കിലും ഉള്ള ഉപഭോക്താവിനും ഉപയോഗിക്കാൻ കഴിയുന്ന തരത്തിലുള്ള ബാങ്കിങ് സേവനങ്ങൾ (AePS)എന്നിവ ഡാക്ക് പേയിലൂടെ ലഭ്യമാണ്.

കൊറോണ 19 മഹാമാരി കാലത്ത്, ഉപഭോക്താക്കളുടെ വീട്ടുപടിക്കൽ ബാങ്ക് സേവനങ്ങൾ ലഭ്യമാക്കിയ ഇന്ത്യ പോസ്റ്റ് പെയ്മെന്റ് ബാങ്കിന്റെ പ്രവർത്തനങ്ങളെ, ഡാക്ക് പേ ഉദ്ഘാടനവേളയിൽ മന്ത്രി ശ്രീ രവിശങ്കർ പ്രസാദ് അഭിനന്ദിച്ചു.ഡാക്പേയുടെ സമാരംഭം തപാൽ വകുപ്പിന്റെ പാരമ്പര്യത്തിന് മുതൽകൂട്ടാണ്.സാമ്പത്തികമായി ഉൾക്കൊള്ളുന്ന ഒരു ആത്മനിർഭർ ഭാരതത്തെക്കുറിച്ചുള്ള പ്രധാനമന്ത്രിയുടെ കാഴ്ചപ്പാടിലേക്കുള്ള ഒരു പുതിയ ചുവട് വയ്പ്പ് കൂടിയാണ് ഇതെന്നും രവി ശങ്കർ പ്രസാദ് പറഞ്ഞു.

ഓരോ ഇന്ത്യക്കാരന്റെയും സാമ്പത്തിക ആവശ്യങ്ങൾ പരിഹരിക്കുന്നതിനായി രൂപകൽപ്പന ചെയ്ത പരിഹാരമാണ് ഡാക് പേയെന്ന് ചടങ്ങിൽ ഐപിപിബി ബോർഡ് സെക്രട്ടറിയും ചെയർമാനുമായ പ്രദീപ്ത കുമാർ ബിസോയി പറഞ്ഞു.ഞങ്ങളുടെ മുദ്രാവാക്യം - ഓരോ ഉപഭോക്താവും പ്രധാനമാണ്, ഓരോ ഇടപാടുകളും പ്രാധാന്യമർഹിക്കുന്നു, ഓരോ നിക്ഷേപവും വിലപ്പെട്ടതാണ്, "ഇന്ത്യ പോസ്റ്റ് പേയ്മെന്റ് ബാങ്ക് എംഡിയും സിഇഒയുമായ ജെ വെങ്കട്ടരാമു പറഞ്ഞു.