സംസ്ഥാന ബജറ്റ് നാളെ: സാമ്പത്തിക പ്രതിസന്ധി സംസ്ഥാന ബജറ്റിനെ ബാധിക്കുമോ?

സംസ്ഥാനം അതിരൂക്ഷമായ സാമ്പത്തിക പ്രതിസന്ധിയിലൂടെ കടന്നുപൊയ്ക്കൊണ്ടിരിക്കുന്ന സമയത്താണ് പിണറായി വിജയൻ സർക്കാരിന്റെ ആറാമത്തെയും സംസ്ഥാന ധനമന്ത്രി ഡോ. തോമസ് ഐസക്കിന്റെ പന്ത്രണ്ടാമത്തെയും വാർഷിക ബജറ്റ് ജനുവരി 15 ന് നിയമസഭയിൽ അവതരിപ്പിക്കാൻ പോകുന്നത്.

2001 ൽ കേരളത്തിന്റെ പൊതുകടം വെറും 25,754 കോടി രൂപയായിരുന്നു. 2020-'21 ലെ ബജറ്റ് കണക്കനുസരിച്ചു നടപ്പു സാമ്പത്തികവർഷം അവസാനിക്കുമ്പോൾ സംസ്ഥാനത്തിന്റെ പൊതുകടം 2,92,087 കോടി രൂപയായിരിക്കും. ഇരുപതു വർഷംകൊണ്ടു സംസ്ഥാനത്തിന്റെ പൊതുകടം 1034 ശതമാനത്തിന്റെ വർധനവാണു കാണിക്കുന്നത്. ഇതു കോവിഡ് 19 നു മുൻപ് അവതരിപ്പിച്ച ബജറ്റിലെ കണക്കാണ്. നിലവിലെ സാമ്പത്തികവർഷം അവസാനിക്കുമ്പോൾ യഥാർഥ കടം വീണ്ടും കുതിച്ചുയരുമെന്നാണ് കണക്കാക്കുന്നത്. സംസ്ഥാനത്തിന്റെ മൊത്തം റവന്യു വരുമാനത്തിന്റെ മൂന്നിൽ രണ്ടുഭാഗം സംഭാവന ചെയ്യുന്നത് നികുതിവരുമാനമാണ്.