ഹണിമൂൺ പോകാൻ കാശില്ലേ? അതിനും കിട്ടും ബാങ്ക് ലോൺ, അറിയേണ്ട കാര്യങ്ങൾ

വിവാഹ സീസൺ ആരംഭിച്ചതിനാൽ പലരും മധുവിധു ആഘോഷങ്ങളും ഹണിമൂൺ ട്രിപ്പുകളും ആസൂത്രണം ചെയ്യുന്ന തിരക്കിലാകും. എന്നാൽ ഹണിമൂണിന് പോകാനുള്ള കാശാണ് നിങ്ങളുടെ പ്രശ്നമെങ്കിൽ, ടെൻഷൻ വേണ്ട, അതിനും ബാങ്കുകൾ നിങ്ങൾക്ക് വായ്പ നൽകും. ഹണിമൂൺ, അല്ലെങ്കിൽ യാത്രകൾക്കായുള്ള ബാങ്കുകളുടെ പ്രത്യേക വായ്പാ പദ്ധതിയെക്കുറിച്ച് അറിയേണ്ട കാര്യങ്ങൾ ഇതാ..

അവധിക്കാല വായ്പ

ഇപ്പോൾ, നിരവധി ഷെഡ്യൂൾഡ് വാണിജ്യ ബാങ്കുകൾ, മൈക്രോഫിനാൻസ് സ്ഥാപനങ്ങൾ, നോൺ-ബാങ്കിംഗ് ഫിനാൻസ് കമ്പനികൾ (എൻ‌ബി‌എഫ്‌സി) തുടങ്ങിയവ ആകർഷകമായ തിരിച്ചടവ് കാലയളവുകളോടെ നിരവധി അവധിക്കാല വായ്പകൾ വാഗ്ദാനം ചെയ്യുന്നുണ്ട്. അവധിക്കാല വായ്പകൾ സുരക്ഷിതമല്ലാത്ത വായ്പകളായതിനാൽ പേഴ്സണൽ ലോണുമായി താരതമ്യപ്പെടുത്തുമ്പോൾ ഇതിന് ബാധകമായ പലിശനിരക്ക് അൽപ്പം കൂടുതലായിരിക്കും.

പലിശ നിരക്ക്

അവധിക്കാല വായ്പകളുടെ പലിശനിരക്ക് 20 ശതമാനം വരെ ഉയർന്നേക്കാം. കാരണം ഇത് വളരെ പ്രാധാന്യമുള്ള ഒരു വായ്പാ ആവശ്യമല്ല. അവധിക്കാല വായ്പയ്ക്ക് അപേക്ഷിക്കുന്ന ദമ്പതികൾ ഭവനവായ്പയോ വാഹന വായ്പയോ ഉൾപ്പെടെയുള്ളവയുടെ തിരിച്ചടവുകൾ കൃത്യമായി നടത്തുന്നവരായിരിക്കണം.

സ്വന്തം സമ്പാദ്യം

കടമെടുത്ത പണത്തിൽ യാത്ര ചെയ്യുന്നതിനേക്കാൾ നല്ലത്, സ്വന്തമായി സമ്പാദിച്ച പണം ഉപയോ​ഗിച്ച് അവധി ആഘോഷിക്കുന്നത് തന്നെയാണ്. കടം വാങ്ങിയ പണം ചെലവഴിക്കുകയും പിന്നീട് തിരിച്ചടയ്ക്കുകയും ചെയ്യുന്നതുമായി താരതമ്യപ്പെടുത്തുമ്പോൾ സ്വന്തമായി സമ്പാദിച്ച് വച്ചിരിക്കുന്ന പണം ചെലവഴിക്കുന്നത് തന്നെയാണ് ബുദ്ധിപൂർവമായ തീരുമാനമാനം.

വായ്പ എടുക്കാൻ മടിയില്ല

67 ശതമാനം ഇന്ത്യക്കാരും വായ്പ എടുക്കുന്നതിന് യാതൊരു വിമുഖതയും കാണിക്കിറില്ലെന്ന് അടുത്തിടെ ഒരു സര്‍വേ റിപ്പോർട്ട് വ്യക്തമാക്കിയിരുന്നു. പ്രത്യേകിച്ചും അത് അവരുടെ കുടുംബത്തിന്റെ ആഗ്രഹം നിറവേറ്റുന്നതിനോ അല്ലെങ്കില്‍ അവരുടെ ജീവിതശൈലി ഉയര്‍ത്തുന്നതിനോ വേണ്ടിയാണെങ്കില്‍ വായ്പ എടുക്കുന്നതിന് യാതൊരു മടിയും ഉണ്ടാകില്ലെന്നാണ് റിപ്പോർട്ട്. ഇന്ത്യയിലെ 12 നഗരങ്ങളില്‍ നിന്നുള്ള സര്‍വേയില്‍ 67 ശതമാനം ഇന്ത്യക്കാരും വായ്പയെടുക്കുന്നതിനെ എതിര്‍ക്കുന്നില്ല.