7 ലക്ഷം രൂപ വരെയുള്ള നികുതി വേണ്ട; 1 രൂപ അധികമായാല്‍ നികുതി 25,000 രൂപ!

ബജറ്റിൽ പുതിയ നികുതി വ്യവസ്ഥയിൽ വലിയ ഇളവുകൾ പ്രഖ്യാപിക്കുകയും പുതിയ നികുതി സ്ലാബ് പ്രഖ്യാപിക്കുകയും ചെയ്തതോടെ പഴയ നികുതി വ്യവസ്ഥയോ പുതിയ നികുതി വ്യവസ്ഥയോ എന്നത് സംബന്ധിച്ച് വലിയ ചർച്ചകൾ നടക്കുന്നുണ്ട്. പുതിയ നികുതിവ്യവസ്ഥ തിരഞ്ഞെടുക്കുന്ന വ്യക്തി​ഗത നികുതിദായകരിൽ വാർഷിക വരുമാനം 7 ലക്ഷം വരെ നികുതി നൽകേണ്ടതില്ല. 

ഇളവുകളൊന്നും തന്നെയില്ലാത്ത പുതിയ നികുതി വ്യവസ്ഥ തിരഞ്ഞെടുക്കുന്നത് യഥാർഥത്തിൽ നികുതിദായകർക്ക് നേട്ടമുണ്ടാക്കുന്നുണ്ടോ? പ്രത്യക്ഷത്തിലെ 7 ലക്ഷത്തിന്റെ നികുതി ഇളവിനപ്പുറം 1 രൂപ അധിക വരുമാനമുണ്ടെങ്കിൽ 25,000 രൂപയാണ് പുതിയ നികുതി വ്യവസ്ഥ തിരഞ്ഞെടുക്കുന്നൊരാൾ നൽകേണ്ടി വരുന്നത്. എങ്ങനെയെന്ന് വിശദമായി പരിശോധിക്കാം.

എങ്ങനെ 7 ലക്ഷം വരെ നികുതി നൽകേണ്ടതില്ല

പുതിയ നികുതി വ്യവസ്ഥയുടെ ആദായ നികുതി സ്ലാബ് ലഘൂകരിച്ചും സെക്ഷൻ 87എ പ്രകാരമുള്ള റിബേറ്റ് നൽകിയും നികുതിദായകരെ പുതിയ നികുതി വ്യവസ്ഥയിലേക്ക് ആകർഷിക്കാനുള്ള ശ്രമങ്ങൾ ബജറ്റിലുണ്ടായിട്ടുണ്ട്. പുതിയ നികുതി വ്യവസ്ഥ 7 ലക്ഷം രൂപ വരെ വരുമാനമുള്ളവർക്ക് മാത്രമെ ലാഭകരമാവുകയുള്ളൂ.

87എ പ്രകാരം നേരത്തെ നൽകിയിരുന്ന 12,500 രൂപ റിബേറ്റ് 25,000 രൂപയാക്കി വർധിപ്പിക്കുയും പുതിയ നികുതി വ്യവസ്ഥയ്ക്ക് ബാധകാക്കുകയും ചെയ്തതോടെയാണ് നികുതി നൽകേണ്ടാത്ത വരുമാന പരിധി 7 ലക്ഷമായത്. 

7 ലക്ഷത്തിന് മുകളിൽ വരുമാനമുള്ള വ്യക്തി തന്റെ 3 ലക്ഷം രൂപയ്ക്ക് മുകളിളുള്ള വരുമാനത്തിന് നികുതി സ്ലാബ് അനുസരിച്ച് ആദായ നികുതി നൽകേണ്ടി വരും. 3 ലക്ഷം മുതൽ 6 ലക്ഷം രൂപ വരെ 5% നികുതിയും 6 ലക്ഷം മുതൽ 9 ലക്ഷം രൂപ വരെയുള്ള വരുമാനത്തിന് 10% നികുതിയും നൽകണം.

ഇതുപ്രകാരം 7 ലക്ഷം വരുമാനമുള്ള വ്യക്തിയുടെ നികുതി ബാധ്യത 25,000 രൂപയായിരിക്കും. എന്നാൽ സെക്ഷൻ 87എ പ്രകാരമുള്ള റിബേറ്റ് വഴി നികുതി പൂജ്യമാക്കി മാറ്റാം. ഇവിടെ ശ്രദ്ധിക്കേണ്ട കാര്യം വാർഷിക വരുമാനം 7 ലക്ഷം കടന്നാൽ റിബേറ്റ് ലഭിക്കില്ലാ എന്നതാണ്. 

7 ലക്ഷത്തിൽ കൂടിയാൽ

പഴയ നികുതി വ്യവസ്ഥയിൽ ഇളവുകൾ ക്ലെയിം ചെയ്യാനും ആദായ നികുതി റിബേറ്റ് ക്ലെയിം ചെയ്യാനുമുള്ള അവസരമുണ്ട്. എന്നാൽ പുതിയ വ്യവസ്ഥയിൽ ഇളവുകൾ ലഭിക്കുന്നില്ല. ഇതിനാൽ വാർഷിക വരുമാനം 7 ലക്ഷത്തേക്കാൾ 1 രൂപ കൂടുതലായാൽ പോലും 3 ലക്ഷം രൂപ മുതലുള്ള ആദായ നികുതി അടയ്ക്കേണ്ടി വരും.

സാമ്പത്തിക വർഷത്തിൽ ഒരു വ്യക്തിയുടെ വാർഷിക വരുമാനം 7,00,006 രൂപ ആണെങ്കിൽ 7,00,005 രൂപ വരെയുള്ള വരുമാനം 7 ലക്ഷമായി തന്നെയാണ് കണക്കാക്കുക. ഒരു രൂപ വരുമാനം വർധിച്ചതിനാൽ 3 ലക്ഷം മുതൽ നികുതി നൽകേണ്ടി വരും. 

25,000 രൂപ നികുതി

3 ലക്ഷം മുതൽ 6 ലക്ഷം രൂപ വരെ 5% നികുതിയായി 15,000 രൂപയും 6 ലക്ഷം മുതൽ 7,00,005 ലക്ഷം രൂപ വരെയുള്ള വരുമാനത്തിന് 10% നികുതിയായി 10,000 രൂപയും നൽകണം. ഇതുവഴി 1 രൂപ അധിക വരുമാനത്തിന് 25,000 രൂപ നികുതി നൽകേണ്ടി വരും. ഇത് ഒഴിവാക്കാൻ പഴയ നികുതി വ്യവസ്ഥയിലെ ഇളവുകൾ ക്ലെയിം ചെയ്താൽ മതിയാകും.

ഇതിനാൽ നികുതി വ്യവസ്ഥ തിരഞ്ഞെടുക്കും മുൻപ് ഏത് രീതിയിലാണ് ലാഭമെന്ന് മനസിലാക്കണം. പഴയ നികുതി വ്യവസ്ഥ തിരഞ്ഞെടുക്കാൻ നേരത്തെ നിക്ഷേപങ്ങൾ നടത്തി ടാക്സ് പ്ലാനിം​ഗ് നടത്തേണ്ടതുണ്ട്.

ചിത്രത്തിന് കടപ്പാട്- Mundra & Associates, CA firm.