അസാധുവാക്കിയ പഴയ 500, 1000 രൂപ കറന്‍സി നോട്ടുകള്‍ കൈവശംവയക്കുന്നത് ഡിസംബര്‍ 31 മുതല്‍ കുറ്റകരമായേക്കും. സര്‍ക്കാര്‍ പിന്‍വലിച്ച പഴയ നോട്ടുകള്‍ കൈവശംവയ്ക്കുകയോ ക്രയവിക്രയം നടത്തുകയോ ചെയ്യുന്നത് കുറ്റകരമാക്കാനാണ് കേന്ദ്ര നീക്കം.

അസാധുവാക്കിയ കറന്‍സി നോട്ടുകള്‍ മാറ്റിയെടുക്കാനുള്ള കാലാവധി ഡിസംബര്‍ 30നാണ് അവസാനിക്കുന്നത്. ഇതിനു ശേഷം പുതിയ നിയമം നിലവില്‍വരും. ഇതിനായി ഓര്‍ഡിനന്‍സ് കൊണ്ടുവരാനാണ് സര്‍ക്കാര്‍ ശ്രമിക്കുന്നത്.

നിയമം പ്രാബല്യത്തിലാകുന്നതോടെ അസാധു നോട്ട് കൈവശംവച്ചാല്‍ കുറഞ്ഞത് 50,000 രൂപ പിഴയൊടുക്കേണ്ടിവരും. എന്നാല്‍ അസാധുവായ 500, 1000 നോട്ടുകള്‍ 10 എണ്ണംവരെ കൈവശം സൂക്ഷിക്കാന്‍ അനുവദിക്കും. ഇതില്‍ കൂടുതല്‍ കണ്ടെത്തിയാല്‍ ശിക്ഷിക്കപ്പെടും. 50,000 രൂപയോ പിടിച്ചെടുക്കുന്ന തുകയുടെ അഞ്ച് മടങ്ങോ ആകും പിഴ.