സോവറിൻ ഗോൾഡ് ബോണ്ട് സബ്‌സ്‌ക്രിപ്‌ഷൻ ഇന്ന് ആരംഭിക്കും, നിങ്ങൾ അറിയേണ്ടതെല്ലാം

സോവറിൻ ഗോൾഡ് ബോണ്ടുകളുടെ ഏറ്റവും പുതിയ സബ്‌സ്‌ക്രിപ്‌ഷൻ ഇന്ന് ആരംഭിക്കും. റിസർവ് ബാങ്ക് ഓഫ് ഇന്ത്യ (ആർ‌ബി‌ഐ) ഇത്തവണ സ്വർണ്ണ ബോണ്ടുകളുടെ ഇഷ്യു വില ഗ്രാമിന് 5,000 രൂപയായാണ് നിശ്ചയിച്ചിരിക്കുന്നത്. ഓൺലൈനിൽ അപേക്ഷിക്കുകയും ഡിജിറ്റൽ മോഡ് വഴി പണമടയ്ക്കുകയും ചെയ്യുന്ന നിക്ഷേപകർക്ക് ഒരു ഗ്രാമിന് 50 രൂപ കിഴിവ് ലഭിക്കും. അവർക്ക് ഇഷ്യു വില ഗ്രാമിന് 4950 രൂപ ആയിരിക്കും.

അവസാന തീയതി

സോവറിൻ ഗോൾഡ് ബോണ്ട് സ്കീം 2020-21 ഒമ്പതാം സീരീസ് വിൽപ്പന 2021 ജനുവരി 1 ന് അവസാനിക്കും. സബ്സ്ക്രിപ്ഷൻ കാലയളവിനു മുമ്പുള്ള ആഴ്ചയിലെ അവസാന മൂന്ന് പ്രവൃത്തി ദിവസങ്ങളിലെ 999 പരിശുദ്ധിയുള്ള സ്വർണ്ണത്തിന്റെ ശരാശരി ക്ലോസിംഗ് വിലയെ (ഇന്ത്യ ബുള്ളിയൻ ആൻഡ് ജ്വല്ലേഴ്‌സ് അസോസിയേഷൻ ലിമിറ്റഡ് പ്രസിദ്ധീകരിച്ചത്) അടിസ്ഥാനമാക്കിയാണ് ബോണ്ടിന്റെ മൂല്യം നിശ്ചയിക്കുന്നത്. അതായത് ഡിസംബർ 22 മുതൽ 24 വരെയുള്ള സ്വർണ വിലയെ അടിസ്ഥാനമാക്കി.

കാലാവധി

സോവറിൻ ഗോൾഡ് ബോണ്ട് 2020-21 ഇന്ത്യൻ സർക്കാരിനുവേണ്ടി റിസർവ് ബാങ്ക് ഓഫ് ഇന്ത്യയാണ് പുറത്തിറക്കുന്നത്. ഗോൾഡ് ബോണ്ടുകൾക്ക് മെച്യുരിറ്റി കാലാവധി എട്ട് വർഷമാണ്. അഞ്ചാം വർഷത്തിന് ശേഷം നിക്ഷേപകർക്ക് പുറത്തു കടക്കാനും സാധിക്കും. അനുവദനീയമായ ഏറ്റവും കുറഞ്ഞ നിക്ഷേപം 1 ഗ്രാം സ്വർണവും സബ്‌സ്‌ക്രിപ്‌ഷന്റെ പരമാവധി പരിധി 4 കിലോയും ആണ്.

എവിടെ നിന്ന് വാങ്ങാം?

സ്വർണ്ണ ബോണ്ടുകൾ നിക്ഷേപകർക്ക് 2.50% വാർഷിക പലിശ നിരക്ക് വാഗ്ദാനം ചെയ്യുന്നുണ്ട്. സ്വർണ്ണ ബോണ്ടുകൾ ബാങ്കുകൾ (ചെറുകിട ധനകാര്യ ബാങ്കുകളും പേയ്‌മെന്റ് ബാങ്കുകളും ഒഴികെ), സ്റ്റോക്ക് ഹോൾഡിംഗ് കോർപ്പറേഷൻ ഓഫ് ഇന്ത്യ (എസ്എച്ച്സിഐഎൽ), നിയുക്ത പോസ്റ്റോഫീസുകൾ, അംഗീകൃത സ്റ്റോക്ക് എക്സ്ചേഞ്ചുകൾ (എൻ‌എസ്‌ഇ, ബി‌എസ്‌ഇ) എന്നിവയിലൂടെയാണ് വിൽക്കുക.

സ്വർണാഭരണം വേണ്ട

സ്വർണ്ണത്തിൽ നിക്ഷേപിക്കാനുള്ള ഫലപ്രദമായ നിക്ഷേപ മാർഗമാണ് സോവറിൻ ഗോൾഡ് ബോണ്ടുകൾ. ഭൌതിക സ്വർണ്ണത്തിന്റെ ആവശ്യം കുറയ്ക്കുകയെന്ന ലക്ഷ്യത്തോടെ 2015 നവംബറിലാണ് സോവറിൻ ഗോൾഡ് ബോണ്ട് പദ്ധതി ആരംഭിച്ചത്.