ഇന്ധന കാറുകള്‍ പൂര്‍ണമായും ഒഴിവാക്കുന്നു; കേരളത്തിലെ സര്‍ക്കാര്‍ ഓഫീസുകളില്‍ ഇനി ഇ-കാര്‍

തിരുവനന്തപുരം: കേരളത്തിലെ സര്‍ക്കാര്‍ ഓഫീസുകളില്‍ വൈദ്യുതി കാറുകള്‍ വരുന്നു. ഇന്ധന കാറുകള്‍ പൂര്‍ണമായും ഒഴിവാക്കിയാണ് വൈദ്യുതി കാറുകളുടെ വരവ്. സര്‍ക്കാര്‍ ഓഫീസുകളുടെ ആവശ്യത്തിനായി കാറുകള്‍ വാടകയ്ക്ക് എടുക്കുകയാണ് ചെയ്യുന്നത്.

അടുത്ത മാസം ആദ്യ ആഴ്ചയോടെ 7 സര്‍ക്കാര്‍ ഓഫീസുകളിലായി 50 ഇ-കാറുകള്‍ വാടകയ്ക്ക് നല്‍കും. പദ്ധതിയുടെ നോഡല്‍ ഏജന്‍സി അനെര്‍ട്ടാണ്. കേന്ദ്ര സര്‍ക്കാര്‍ സ്ഥാപനമായ എഫിഷ്യന്‍സി സര്‍വീസസ് ലിമിറ്റഡാണ് ഇ-കാറുകള്‍ അനെര്‍ട്ടിന് അനുവദിക്കുന്നത്.

പദ്ധതിയുടെ പരീക്ഷണാടിസ്ഥാനത്തില്‍ അനര്‍ട്ടിന്റെ ആറ് ഓഫീസുകളില്‍ ഇ-കാറുകള്‍ വാടകയ്ക്ക് നല്‍കിയിട്ടുണ്ട്. ഇതിനകം തന്നെ 65 സര്‍ക്കാര്‍ സ്ഥാപനങ്ങള്‍ വാഹനത്തിനായി അനെര്‍ട്ടിനെ സമീപിച്ചിട്ടുണ്ട്. അപേക്ഷ നല്‍കി 20 ദിവസത്തിനുള്ളില്‍ കാറുകള്‍ എത്തിക്കാന്‍ അനെര്‍ട്ടിന് സാധിക്കും.

അതേസമയം, കാറുകള്‍ ചാര്‍ജ് ചെയ്യുന്നതിന് ദേശീയപാത -സംസ്ഥാന പാത, എന്നിവയ്ക്കടുത്ത് ചാര്‍ജിംഗ് സ്റ്റേഷനുകള്‍ സ്ഥാപിക്കുന്നതിന് രജിസ്‌ട്രേഷന്‍ ആരംഭിച്ചിട്ടുണ്ട്. 1000 ചതുരശ്ര അടി സ്ഥലമുള്ളവരെയാണ് ഇതിനായി പരിഗണിക്കുക.