20,000 രൂപയിലധികം ഇനി കടം കൊടുക്കും മുന്‍പ് സൂക്ഷിക്കണം; പിഴ വരും; അറിഞ്ഞില്ലേ

കറന്‍സി ഇടപാടുകള്‍ നികുതി വകുപ്പുകളുടെ പ്രത്യേക ശ്രദ്ധ പതിയുന്ന ഇടങ്ങളാണ്. സാമ്പത്തിക വർഷത്തിൽ 20 ലക്ഷത്തിൽ കൂടുതൽ തുക പണമായി ഇടപാട് നടത്തുന്നതിന് കേന്ദ്ര പ്രത്യക്ഷ നികുതി ബോർഡ് പാൻ കാർഡ് വിവരങ്ങളും ആധാറും നിർബന്ധമാക്കിയിട്ടുണ്ട്.

നേരത്തെയിത് ദിവസം 50,000 രൂപയുടെ ഇടപാടിനായിരുന്നു സമർപ്പിക്കേണ്ടത്. വാർഷിക പരിധിയുണ്ടായിരുന്നില്ല. പുതിയ ചട്ടപ്രകാരം സാമ്പത്തിക വർഷത്തിൽ വലിയ തുകയുടെ ഇടപാടുകൾ നടത്തുന്നൊരാൾ പാൻ വിവരങ്ങൾ സമർപ്പിക്കേണ്ടതുണ്ട ഇതിനോടൊപ്പം വ്യക്തികൾ പരസ്പരം നടത്തുന്ന പണമിടപാടുകൾക്കും നിശ്ചയിച്ചിട്ടുണ്ട്. ഇവ വിശദാമായി നോക്കാം. 

20,000 രൂപയുടെ പരിധി

ആദായ നികുതി നിയമത്തിലെ 269എസ്എസ് സെക്ഷന്‍ പ്രകാരം 20,000 രൂപയിലധികം തുക കറന്‍സിയായി വായ്പ വാങ്ങാന്‍ പാടില്ല. ഇത് ലംഘിക്കുന്നവര്‍ 271ഡി സെക്ഷന്‍ പ്രകാരം നല്‍കിയ പണം പിഴ അടയ്‌ക്കേണ്ടി വരും. ബാങ്ക്, സര്‍ക്കാര്‍ വകുപ്പുകള്‍, പോസ്റ്റ് ഓഫീസ് എന്നിവ നടത്തുന്ന ഇടപാടുകള്‍ക്ക് ഇളവുണ്ട്. മറിച്ചുള്ള സ്ഥാപനങ്ങള്‍ 20,000 രൂപയില്‍ കൂടുതല്‍ തുക വായ്പയായി നല്‍കിയാല്‍ പിഴ വരും. 

കുടുംബാം​ഗങ്ങളിൽ നിന്ന് വാങ്ങാം

കുടുംബങ്ങളിൽ നിന്ന് 20,000 രൂപയിൽ കൂടുതൽ കറൻസി വഴി 20,000 രൂപയിൽ കൂടുതൽ തുക വാങ്ങുന്നതിന് നിയമപരമായ തടസമില്ല. എന്നാൽ ഇവ ബിസിനസ് ആവശ്യങ്ങൾക്കായി വാങ്ങിയതാണെന്ന് അധികാരികളെ ബോധിപ്പിക്കാനാകണം. ബിസിനസ് ആവശ്യങ്ങൾക്കല്ലെങ്കിലും പണം കടം വാങ്ങിയാൽ ആദായ നികുതി വകുപ്പിനെ ബോധ്യപ്പെടുത്താനായാൽ പിഴ ഒഴിവാക്കും. എന്നാൽ ഈ തുക രണ്ട ലക്ഷത്തിൽ കൂടാൻ പാടില്ല. ആദായ നികുതി നിയമത്തിലെ സെക്ഷൻ 273ബിയിൽ ഇക്കാര്യം വ്യക്തമാക്കുന്നുണ്ട്. 

ഒരു വ്യക്തി ഭാര്യയിൽ നിന്ന പെട്ടന്നുള്ള ആവശ്യത്തിന് 60,000 രൂപ കറൻസിയായി കൈപ്പറ്റിയാലും ആദായ നികുതി 269എസ്എസ് പ്രകാരം കുറ്റകരമാണ്. എന്നാൽ പണം വാങ്ങിയ വ്യക്തി അത്യാവശ്യം തെളിയിച്ചാൽ നിയമ പ്രകാരമുള്ള പിഴ ശിക്ഷ ഒഴിവാക്കാൻ സാധിക്കും. ഇത് സംബന്ധിച്ച് 2022 ൽ വന്ന ട്രിബ്യൂണൽ വിധിയും ഇക്കാര്യം വ്യക്തമാക്കുന്നു.

പണം വാങ്ങിയത് ഉചതമായ ബിസിനസ് ആവശ്യത്തിനാണെന്ന് തെളിയിച്ചാൽ ആദായ നികുതി നിയമ പ്രകാരമുള്ള പിഴ ശിക്ഷ ഒഴിവാക്കണം എന്നായിരുന്നു ഉത്തരവ്. ബൽവൻ സിംഗും അസിസ്റ്റന്റ് കമ്മിഷണർ ഓഫ് ഇൻകം ടാക്‌സും തമ്മിലുള്ള കേസിൽ ഡൽഹി ട്രിബ്യൂണലാണ് വിധി പറഞ്ഞത്. 

പിഴ നൽകേണ്ടത് ആര്

പിഴ നൽകേണ്ടത് ആരാണെന്ന് ചോദ്യമുണ്ടാകും. പണം നൽകുന്നയാളാണോ സ്വീകരിക്കുന്നയാളാണോ പിഴ നൽകേണ്ടതെന്ന് നോക്കാം. നിയമത്തില്‍ പറയുന്ന 2 സെക്ഷനുകളും പണം വാങ്ങുന്നയാളെ ബാധിക്കുന്നതാണ്. സെക്ഷന്‍ 269എസ്എസ് പ്രകാരം പണം സ്വീകരിക്കുന്നതിനെയും സെക്ഷന്‍ 269ടി തിരിച്ചടവിനെയും പറ്റിയാണ് പറയുന്നത്. ഇതിനാല്‍ പണം നല്‍കുന്നയാള്‍ പിഴ നല്‍കേണ്ടി വരുന്നില്ല. 

2 ലക്ഷത്തിന്റെ പരിധി

ആദായ നികുതി നിയമത്തിലെ സെക്ഷന്‍ 269എസ്ടി പ്രകാരം ഒരു ദിവസം നടത്താൻ സാധിക്കുന്ന കറൻസി ഇടപാടിന്റെ പരിധി 2 ലക്ഷം രൂപയാണ്. ഒറ്റ തവണയായോ പല തവണകളായോ നടത്താവുന്ന ഇടപാടുകൾക്കുള്ള പരിധിയാണിത്. 2 ലക്ഷത്തിൽ കൂടുതൽ തുക നൽകേണ്ട സാഹചര്യത്തിൽ ബാങ്കിനെ സമീപിക്കണം. ഉദാഹരണമായി 3.50 ലക്ഷം രൂപയുടെ സ്വർണം വാങ്ങിയൊരാൾക്ക് ഈ തുക മുഴുവൻ പണമായി നൽകാൻ സാധിക്കില്ല. 2 ലക്ഷം വരെ പണമായും ബാക്കി വരുന്ന തുക ബാങ്ക് വഴിയും നൽകാം.