മാസത്തിൽ 1,500 രൂപ എന്ന കടമ്പ കടക്കാൻ സാധിക്കുമോ? നേടാം 35 ലക്ഷം; ലാഭകരമായ പോസ്റ്റ് ഓഫീസ് പദ്ധതി

സാധാരണക്കാരായ നിക്ഷേപകരുടെ വലിയ ആശ്രയമാണ് പോസ്റ്റ് ഓഫീസ് പദ്ധതികൾ. പോസ്റ്റ് ഓഫീസ് പദ്ധതികളിലേക്ക് ജനങ്ങളെ ആകർഷിക്കുന്നതിന് കാരണം അവയുടെ സുരക്ഷ തന്നെയാണ്. സർക്കാർ ഗ്യാരണ്ടിയുള്ള നിക്ഷേപമായതിനാൽ കാലവധിയിൽ മുതൽ തിരികെ ലഭിക്കുമെന്നതിൽ യാതൊരു സംശയവും നിക്ഷേപകർക്കില്ല. പോസ്റ്റ് ഓഫീസ് പദ്ധതികളിൽ സുരക്ഷയ്ക്കൊപ്പം മാന്യമായ പലിശ നിരക്കും നൽകുന്നുണ്ട്. തൊട്ടടുത്തുള്ള പോസ്റ്റ് ഓഫീസിലെത്തി സങ്കീർണതകളില്ലാതെ നിക്ഷേപം ആരംഭിക്കാമെന്നതും ഇവയുടെ നേട്ടമാണ്.

നിക്ഷേപത്തിനൊപ്പം ഇൻഷൂറൻസ് പരിരക്ഷ കൂടി നൽകുന്നൊരു പദ്ധതി ആവശ്യമായവർക്ക് അതിനുള്ള സൗകര്യവും പോസ്റ്റ് ഓഫീസിലുണ്ട്. റൂറൽ പോസ്റ്റൽ ലൈഫ് ഇൻഷൂറൻസ് നടപ്പിലാക്കുന്നൊരു പദ്ധതിയാണ് ​ഗ്രാം സുരക്ഷാ സ്‌കീം. മാസത്തിൽ 1500 രൂപ നിക്ഷേപിക്കുന്നൊരാൾക്ക് കാലാവധിയിൽ 35 ലക്ഷം രൂപ പദ്ധതി ഉറപ്പ് നൽകുന്ന പദ്ധതിയാണിത്. വിശദാംശങ്ങൾ നോക്കാം. 

​ഗ്രാം സുരക്ഷ പോളിസി

റൂറൽ പോസ്റ്റൽ ലൈഫ് ഇൻഷൂറൻസിന് കീഴിലാണ് ഗ്രാം സുരക്ഷ പോളിസി നടപ്പിലാക്കുന്നത്. 1995 ൽ ​ഗ്രാമീണ ജനതയക്ക് ഇൻഷൂറൻസ് സൗകര്യം ഉറപ്പാക്കാനാണ് റൂറൽ പോസ്റ്റൽ ലൈഫ് ഇൻഷൂറൻസ് ആരംഭിക്കുന്നത്. ലൈഫ് ഇൻഷൂറൻസിന്റെയും സമ്പാദ്യത്തിന്റെയും ​ഗുണങ്ങൾ ലഭിക്കുന്ന പോളിസിയാണിത്. പ്രീമിയം അടവ് പൂർത്തിയാകുമ്പോൾ നിക്ഷേപകന് തുക തിരികെ ലഭിക്കും. പോളിസി കാലയളവിൽ അക്കൗണ്ട് ഉടമ മരണപ്പെട്ടാൽ നോമിനിയ്ക്കോ അല്ലെങ്കിൽ നിയമപരമായ പിന്തുടർച്ചാ അവകാശിയ്ക്കോ തുക ലഭിക്കും. 

പ്രായ പരിധി

പദ്ധതിയിൽ ചേരാനുള്ള കുറഞ്ഞ പ്രായ പരിധി 19 വയസാണ് 55 വയസിനുള്ളിൽ പോളിസിയിൽ ചേരുകയും വേണം. 10,000 രൂപ രൂപ മുതൽ 10 ലക്ഷം രൂപ വരെ അഷ്വേഡ് തുകയുള്ള പോളിസി ലഭ്യമാണ്. മാസത്തിലോ, പാദ വാർഷികമായോ, അർധ വാർഷികമായോ, വാർഷികമായോ പ്രീമിയം അടയ്ക്കാവുന്നതാണ്. പ്രീമിയം നൽകുന്നതിനായി ഉപയോക്താക്കൾക്ക് 30 ദിവസത്തെ ഗ്രേസ് പിരീയഡും ലഭിക്കും.

പ്രീമിയം അടവ് കാലാവധി 55 വയസ്, 58 വയസ്, 60 വയസ് എന്നിങ്ങനെ ക്രമീകരിക്കാം. പോളിസിയിലെ ഏറ്റവും പ്രധാനപ്പെട്ട ആകർഷണീയത ബോണസ് തുകയാണ്. ഏറ്റവും ഒടിൽ പ്രഖ്യാപിച്ച ബോണസ് പ്രതിവർഷം 1000 രൂപയ്ക്ക് 65 രൂപയാണ്.

വായ്പ സൗകര്യം

പോളിസിയിൽ ചേർന്നൊരാൾക്ക് പെട്ടന്നുണ്ടാകുന്ന സാമ്പത്തിക ആവശ്യങ്ങൾക്ക് വായ്പ ലഭിക്കും. പോളിസി വാങ്ങി 4 വർഷം പൂർത്തിയായതിന് ശേഷമാണ് വായ്പാ സൗകര്യം ലഭിക്കുക. പോളിസി ആരംഭിച്ച് മൂന്ന് വർഷം പൂർത്തിയാകുമ്പോൾ പോളിസി അവസാനിപ്പിക്കാനും സാധിക്കും. എന്നാൽ അധിക നേട്ടങ്ങളൊന്നും ഇതുവഴി ലഭിക്കില്ല. അടച്ച തുക തിരികെ ലഭിക്കും.

5 വർഷത്തിന് മുൻപ് പോളിസി സറണ്ടർ ചെയ്താൽ ബോണസിന് അർഹതയുണ്ടായിരിക്കില്ല. പോളിസി കാലയളവിൽ പ്രീമിയം അടയ്ക്കുന്നതിൽ വീഴ്ച വരുത്തിയ പോളിസി ഉടമയ്ക്ക് പോളിസി വീണ്ടും ആരംഭിക്കാനാകും, കുടിശ്ശികയായി കിടക്കുന്ന പ്രീമിയം തുക മുഴുവനായി അടച്ചാൽ മതിയാകും. 

കാൽക്കുലേറ്റർ

19-ാം വയസിൽ 10 ലക്ഷം രൂപയുടെ പോളിസി വാങ്ങുന്നൊരാൾക്ക് മാസത്തിൽ പ്രീമിയം അടവ് വരുന്നത് 1,515 രൂപയാണ്. ഇത് 55 വർഷകാലം അടയ്ക്കണം. 58 വർഷ പോളിസി ടേം തിരഞ്ഞെടുക്കുന്നവൊരാൾക്ക് 1,463 രൂപയും 60 വർഷ്‌ത്തേക്ക് അടയ്ക്കുന്നൊരാൾക്ക് 1,411രൂപയുമാണ് മാസ അടവ് വരുന്നത്.

ഇത് അനുസരിച്ച് 55 വയസിൽ മെച്യൂരിറ്റി ബെനഫിറ്റായി 33.40 ലക്ഷം രൂപ ലഭിക്കും. 55 വയസിന് ശേഷം 33.40 ലക്ഷം രൂപയും 60 55 വയസിന് ശേഷം 34.60 ലക്ഷം രൂപയും ലഭിക്കും.